Sancho khelh a ngai tawh - Ferdinand

England-in Croatia an hneh avangin fak an hlawh a, Scotland lakah beisei ang result an neih loh avangin sawiselna an tawk nasa viau thung.

Euro ṭan a nih hmain England-in tlarhmaa players an neih ṭhatzia sawi a ni a, a tak ramah erawh eng ruai an ni lo - match hnih an khelhah goal khat chiah an la khung a, target-ah vawi thum chiah shot an la nei.

Southgate-a'n tlarhmaah Phil Foden, Kane leh Sterling a ring ṭhin a, Jadon Sancho leh Dominic Calvert-Lewin te a la chhawr miah lo a, Jack Grealish leh Marcus Rashford-te pawhin sawi tham minute an la khel lo.

A bik takin Sancho-a'n Southgate-a rinna a hlawh thei lo hi thi mak a tling a, Croatia nena an inkhelah phei chuan squad-ah a tel lo - Sancho 'class' ngaihtuahin a mak.

England defender hlui Rio Ferdinand chuan, "Tlarhmaah hian inkhel thlak danglam thei player kan nei tih ka hria a, mahse, kan chhawr ṭangkai a ngai a ni. Sancho hian khelmual pawh a la rap chhin lo," a ti!

Manchester United hel lai Sancho hian Borussia Dortmund-ah a hming a chher viau a, season hman zawh takah khan German club tan hian inelna hrang hrangah match 38 khelin goal 16 a khung a, assist vawi 20 a nei thei.

Ferdinand chuan, "A record en ila, theihna a nei tih kan hria. Season khata che ṭha hluai player a ni lo a, kum thum chhung chu a khel ṭha tawh a ni - rawlthar mai a ni tih theihnghilh lo ila," a ti.

Kum 21 mi Sancho hian kum 2017 khan Dortmund hi Manchester City academy aṭangin a zawm a, German club tan inelna hrang hrangah match 137 khelin goal 50 a khung a, assist vawi 64 a nei bawk.

Ferdinand chuan, "Tun hnai season thum chhunga kan player zinga creative bera ka neih chu match hmasa berah squad-ah pawh kan dah lo a, match hnihnaah bench a chang pha ṭawk.

"Anni ang player hi khel turin fan-te chuan kan duh vek a, kan hmu châk a ni. Kan hunlai khan, anni anga mual sira khel thei player hi nei ila nomawi chawi theih ang chu kan chawi kim vek ang," a ti!

Ferdinand-a'n inkhel tura Sancho-a duhsak hi a awm a, zanina Czech an hmachhawn hunah bul a ṭan dawn a nih erawh chuan Phil Foden emaw Sterling emaw chu a tuar tur an ni ang.

Sancho hian tun hnai season thum chhungin Dortmund tan goal 109 a thawk chhuak a, Sterling (110) tih loh chu tuna England squad-ah tun hnai kum thum chhunga club tana goal thawhchhuah hnem lama tluk loh a nei lo.