Star thar Patrik Shick

Czech Republic-in Pavel Nedved an nei ṭhin a, Juventus tan a khelh laia Ballon d'Or chawimawina meuh dawngtu hnungzuitu hi an nei thei meuh lo.

Borussia Dortmund leh Arsenal tana khel ṭhin Tomas Rosicky kha theihnghilh a harsa a, mahse, Nedved nen an chawlh hnuah Czech Republic-in star sawi hluai tur an nei hleithei lo a, hei hi an buaina a ni.

Euro 2020 a thleng a, star thar a piang - a hming chu Patrik Shick a ni. Czech striker hian Euro-ah goal thum a khung tling ta der a, Czech khawvelah chuan titi dang a leng meuh lo.

Czech top flight club Bohemians Prague-a Shick career ṭantir lama enkawltu Roman Pivarnik chuan, "Player inringtawk tak a ni a, Croatia laka hnar thi chunga penalty a pet ngam khan a huaisenzia a pholang," a ti.

Kum 25 mi Shick hian zaninah pawh goal khung a tum leh ang tih a chiang a, England-in an veng bik a nih loh chuan an tisual ang.

Shick hian season hman zawh takah khan Bayer Leverkusen tan inelna hrang hrangah match 36 khelin goal 13-a khung a, assist vawi hnih a nei - David Beckham a ngaihsan vanga a room banga England captain hlui thlalak tam tak tar ṭhintu hian a player ngaihsante ram a hmachhawn dawn a, Wembley-ah a hming chher loh a duh dawn lo.

Czech hian West Ham-a season duhawm tak hmangtu, defensive midfielder Tomáš Soucek leh Hammers tana a khelhpui, defender Vladimír Coufal-te pawh an nei a, Scotland laka draw result bak hlawh chhuak lotu England tan Scotland laka 2-0 a chak thei Czech hi zuam sual theih an ni ang.