Switzerland beiseina siamtu Shaqiri

Euro 2020 group A inkhel hmuhnawm takah Switzerland-in Turkey 3-1 in an hneh a, Vladimir Petkovic hote tan pathumna ni mah se last 16 luh theihna kawng a inhawng zau hle.

Switzerland tan Haris Seferovic-a'n goal hmahruai a khung hnuah Xherdan Shaqiri-a'n goal hnih a khung a, goal pathum hi Steven Zuber-a siamsak vek a ni. Turkey tan Irfan Can Kahveci-a'n goal khat a khung a, Senol Gunes-a hoten tun inelnaah goal khat chiah an khung.

Goal ropui
Baku-ah Turkey-in bul ṭan ṭha mah se Switzerland-in an nawr hmasa berah an khung a, minute rukna lekah Seferovic-a'n box pawn aṭanga pet thutin goal kilah tak a kal.

Minute 26-naah Shaqiri-a'n box pawn aṭangin goal kilah tak a khung a, tun inelnaa goal mawi ber zinga mi a ni. Turkey-in minute 62-naah siphurh an sut ṭhen a, hei pawh goal ropui tho. Kahveci-a'n box pawn aṭangin mawi zetin a pet goal.

Goal a lut tam chungin keeper pahnih Swiss keeper Yann Sommer leh Turkish keeper Ugurcan Caki te an che ṭha. Minute 68-naah Steven Zuber ball pass mawi tak chu Shaqiri-a'n a goal-ah a chantir.

Granit Xhaka-a'n freekick aṭangin goal ban a pet per a, Switzerland-in an khung belh thei tawh loh avangin pahnihnaa awm Wales chu goal difference hmangin an pha lo.

Eng nge an sawi?
Switzerland coach Vladimir Petkovic chuan, "Kan theihna kan pho chhuak a, ka team khelh danah ka lungawi. Minute 90 chhunga kan khelh danah sawisel tur a awm lo a, kan tih tur kan zo tawh. Last 16 luh kan inbeisei a, team dang result kan nghah a ṭul thung," tiin a sawi.

Turkey coach Senol Gunes chuan, "Tun tournament chhung zawkin kan khel ṭha tawk lo a ni. First match khan player-teah nghawng lian tak a nei a, kan nih tur ang kan ni ta lo. Tuna player-te hian hun rei tak Turkey tan an khel thei ang," tiin a sawi.

Player inlante
Switzerland: Sommer; Elvedi, Akanji, Rodríguez; Widmer (Mbabu 90+2), Freuler, Xhaka, Zuber (Benito 85); Shaqiri (Vargas 75); Embolo (Embolo 85), Seferović (Gavranović 75)
Turkey: Uğurcan Çakır; Zeki Çelik, Merih Demiral, Çağlar Soyuncu, Mert Muldur; Cengiz Under (Kenan Karaman 80), Ozan Tufan (Yusuf Yazıcı 64), Kaan Ayhan (Okay Yokuşlu 64), Irfan Can Kahveci (Orkun Kokcu 80), Hakan Çalhanoğlu (Dorukhan Toköz 86); Burak Yılmaz