Point li hmu thei dang an awm em?

Euro 2020-ah team 24 an tel a, team 16-in second round an lut dawn. Group paruk aṭangin a sang pahnih bakah pathumna ti ṭha paliten last 16 hi an lut ang.

Group A-ah Switzerland chu pathumnaah an awm a, point li an hmuh avangin dinhmun ṭha takah ding mah se goal difference -1 a nih avangin tla ve thei an la ni. Nizan khan group B leh C ten group match hnuhnung ber an khel a, Switzerland dinhmun a hriat nghal theih dan a awm.

Zaninah group D an inkhel dawn a, Croatia-in Scotland an hneh chuan an group-ah pahnihna ni pha lo mah se goal difference hmangin Switzerland chungah an awm ang.

Group E-ah palinaa awm mek Poland-in Sweden chu goal khat chauha an hneh a, Spain-in Slovakia an hneh bawk chuan he group-a pathumna hi Switzerland chungah an awm leh thei bawk.

Group F-ah France leh Portugal an inhnehtawk a, Germany-in Hungary an hneh bawk chuan champion lai Portugal hi pathumnaah an awmin Switzerland chungah an awm ang. Group B leh C result hriat hnua Switzerland hian last 16 an la lut lo a nih chuan point li nei tawh team ni mah se nuam sain an awm thei lo ang.