Zaninah World Champion Vs European Champion
Euro 2020 group stage chu zanin hian khelh zawh a ni dawn a, a tawp khar nan zanin dar 12:30 hian World champion France leh European champion Portugal te an inkhel dawn. Cristiano Ronaldo telna team hi tla thei an la ni.
Group F inkhel dangah Germany leh Hungary te Allianz Arena-ah an inkhel dawn bawk. Hungary hian Germany hi an hneh a nih chuan Joachim Low-a hote hi tla thei an ni bawk.
Phuba lak hun
Kum 2016 khan France-in European Championship a thleng a, mahni ram ngeia champion-na hun ṭha a inhawng. Stade de France-a mipui 75,868 hmaah Portugal-in extra time-a Eder-a goal hmangin hnehna an chang a, Didier Deschamps-a hote an hawi hai hle.
Deschamps-a hote hian kum hnih hnuah FIFA World Cup nomawi an chawi a, kuminah Euro nomawi chawi ngei an tum. Les Bleus hi team ṭha ber leh champion rinkai ber an ni a, amaherawhchu an match hnuhnung berah Hungary nen an inhnehtawk.
Chutihrualin tun hi France tan Portugal laka phuba lakna hun ṭha a ni. Hungary nen an inkhelh ṭum kha tlai dar 3 a nih avangin 30°C a ni pha a, khelh a harsa. Tunah erawh anmahni hunah zan dar 9:00 a nih tawh dawn avangin khelh a awlsam sawt ang.
Player ṭha bik
France leh Portugal hi player ṭha bik awm khawmna an ni a, inkhel pawimawh a nih avangin a hmuhnawm dawn. Budapest-ah stadium khata inkhel entu an awm theih avangin a hmuhnawm lehzual ang.
Cristiano Ronaldo-a'n ram tana goal khung tam ber Iranian striker Ali Daei nihrual turin goal hnih chiah an mamawh tawh a, Euro 2020-ah Juventus striker hian match hnih khel tawhin goal hnih a khung der tawh.
France nen pawh Ronaldo bawk hi a hmuhnawm dawn a, player dang ṭha en châkawm an awm. Liverpool forward Diogo Jota, Man United midfielder Bruno Fernandes, Man City midfielder Bernardo Silva leh Lille midfielder Renato Sanches te an ni nawk.
Amaherawhchu Germany lakah Ruben Dias telna tlarhnung a pawp a, Pepe kum a upa ta deuh a, wing back-a awm Nelson Semedo leh Raphael Guerreiro te an che ṭha lo. Portugal coach Fernando Santos-a'n tlarhnung tih phui hna a thawh a ṭul dawn.
France lamin Kylian Mbappe an kawl a, PSG forward hian goal la khung lo mah se tun inelnaa goal bawh na ber zinga mi a ni pha tho. Karim Benzema erawhin beisei a la pha lo a, Antoine Griezmann te nen France chhanchhuah hna an thawk a ṭul.
Barcelona forward Ousmane Dembele chu hliam vangin a tel thei dawn tawh lo a, amaherawhchu France squad a chhah avangin buaina a tling pha lo. Team pahnih hi Germany nena an inkhelh dan aṭanga tehin France an ṭha zawk a, amaherawhchu Euro 2016 final-a chak zawk chu Portugal an ni.
Group F - Thlirna Tawi
France, Germany,
Portugal & Hungary
Zanin Inkhel Tur
Germany 12:30 AM Hungary
Venue : Allianz Arena, Munich
Portugal 12:30 AM France
Venue : Ferenc Puskás Stadium, Budapest
Inlan tura beiseite
Germany Vs Hungary
Germany: Neuer; Ginter, Hummels, Rüdiger; Kimmich, Gündoğan, Kroos, Gosens; Sané, Gnabry, Havertz
Hungary: Gulácsi; Botka, Orbán, At. Szalai; Négo, Kleinheisler, Ádám Nagy, Schafer, Fiola; Ád. Szalai, Sallai.
Portugal Vs France
Portugal: Rui Patrício; Nélson Semedo, Rúben Dias, Pepe, Guerreiro; Danilo, Renato Sanches, Bruno Fernandes; Bernardo Silva, Ronaldo, Diogo Jota
France: Lloris; Koundé, Varane, Kimpembe, Hernández; Pogba, Kanté, Tolisso; Griezmann, Benzema, Mbappé
Last 16-a Group F khingpui tur
1-na Vs Switzerland/Ukraine
2-na Vs Czech/England/Croatia/Scotland
3-na Vs Belgium/Netherlands
Group F pathumnain last 16 an luh a, Group A, C leh D a mi an tlin bawk chuan an khingpui tur chu Belgium a ni. Pathumna aṭanga A, C, D leh F te an nih loh a, group F-a pathumna an tling phak bawk chuan an khingpui tur chu Netherlands a ni ang.
Final ang maia pawimawh a ni. A harsa dawn tih kan hria a, mahse kan inpeih. Stadium khatin entu an awm dawn a, khatiang boruaka inkhelh kha nuam ka ti. - Antoine Griezmann, France forward
Germany nena kan inkhel kan thlirlet ang a, kan tihsual lai dah ṭhain rilru tharin France nena kan inkhel tur atan kan insawrbing ang. - Fernando Santos, Portugal coach
Benzema chungah hian ka rinna zawng zawng ka nghat a, chutiang bawkin ka player zawng zawng ka ringtawk. Striker-in goal khung loh chang an nei a, he position hi chuan goal an khung emaw khung lo emaw pawhin ngaihven an hlawh bik ṭhin. - Didier Deschamps, France coach
Tlin theih dan?
FRANCE
• An tling tawh.
• Portugal an hneh chuan pakhatna an ni ang.
• Portugal nena a inhnehtawk a, Hungary-in Germany an chelh chuan pakhatna an ni tho ang.
• Portugal an hneh lo a nih chuan pahnihna a ni ang a, Germany-in Hungary an hneh phei chuan pathumnaah an awm thei bawk.
GERMANY
• Hungary laka point an hmuh chuan an tling.
• Hungary an hneh a, Portugal-in France an chelh chuan pakhatna an ni ang.
• Hungary nen an inhnehtawk a, France-in Portugal laka point an hmuh chuan pahnihna an ni ang.
• Hungary nen an inhnehtawk a, Portugal-in France an hneh chuan pathumna an ni ang.
• Hungary an hneh lo a, Portugal-in point an hmuh chuan an tla. Chutihrualin Portugal an chak lo ve thung erawh chuan Germany tan pathumna aṭanga last 16 luh dan kawng a inhawng ve
thei ang.
PORTUGAL
• France laka point an hmuh chuan an tling.
• France an hneh a, Hungary-in Germany an chelh chuan pakhatna an ni ang.
• France nen an inhnehtawk a, Germany an chak loh chuan pahnihna an ni ang. Chutihrualin Germany leh Hungary an inhnehtawk ve bawk chuan pathumna ni chungin an tling ang.
• France an hneh lo a, Hungary-in Germany an hneh chuan an tla. Chutihrualin Germany-in point an hmuh chuan pathumna aṭanga last 16 luh theih dan a awm ang.
HUNGARY
• Last 16 lut turin Germany an hneh a ngai a, an inhnehtawk emaw an chak lo a nih chuan an tla.