Spain tan chak a ṭul

Zanin dar 9:30 hian Spain-in an mual Estadio La Cartuja-ah Slovakia an mikhual dawn a, Luis Enrique hote tan Euro last 16 lut turin chak ngei a ṭul.

Euro 2008 leh 2012 baka World Cup 2010 nomawi chawi thei La Roja hian an match hmasa berah Sweden lakah inkhel thununin 86% ball possession chang mah se goal an khung theih miau loh avangin an inhnehtawk.

Spain tlarhma an dem a, striker Alvaro Morata-a'n sawisel a tawng hnem. La Roja-in Poland an tum a, minute 25-naah Morata-a'n khung mah se Robert Lewandowski-a'n ven hneh loh avangin 1-1 in an inhnehtawk. Match hnihnaah pawh hian Spain hian 77% ball an chang a, an point hlawhchhuah zat erawh a ngai reng.

Spain chanchinbu lian infiamna lam chanchin ziahna pakhat chuan Enrique-a'n starting eleven a thlak nual tur thu an sawi a, bul ṭantu zingah Sergio Busquets, César Azpilicueta leh Mikel Oyarzabal te an awm an ring a, inrintawkna an hloh tihin an ziak bawk.

La Roja hian inrintawkna an hloh ngei niin a lang a, amaherawhchu Slovakia lakah Gerard Moreno leh Morata ten goal an khung chuan inrintawkna hi an nei let leh thuai ang. Chutihrualin Slovakia hi awlsam taka hneh theih tur erawh an ni bik lo.

Marek Hamsik-a telna team hian an match hmasa berah Poland an hneh a, Sweden nen an inkhelh ṭum pawhin an khel ṭha hle. Slovakia coach Stefan Tarkovic chuan, "Sweden leh Poland kha keini aia rinkai zawk an ni a, Spain phei chu khaikhin chi kan ni lo. Spain hi chu kan group ang chauh pawh ni loin tun inelnaa champion rinkai ni pha an ni a, chutichugn chuan vanneih theih kan inbeisei," tiin beiseina an neih thu a sawi.

Group E Thlirna Tawi
Zanin Inkhel Tur
Sweden 9:30 PM Poland
Venue : Krestovsky Stadium,
St Petersburg
Slovakia 9:30 PM Spain
Venue : Estadio La Cartuja, Seville

Slovakia Vs Spain
Slovakia: Dubravka; Pekarík, Satka, Skriniar, Hubočan; Kucka, HroSovský; Haraslín, HamSík, Mak; Duda
Spain: Unai Simón; Azpilicueta, Laporte, Pau Torres, Gayà; Llorente, Busquets, Thiago; Gerard Moreno, Morata, Traoré

Sweden Vs Poland
Sweden: Olsen; Lustig, Lindelof, Danielson, Augustinsson; S Larsson, Ekdal, Olsson, Forsberg; Isak, Quaison
Poland: Szczęsny; Bereszyński, Bednarek, Glik; Jozwiak, Moder, Krychowiak, Zieliński, Puchacz; Lewandowski, Świderski