Messi-a'n ram tan match 147 a khel ta : Argentina leh Chile an tlang chiang
Lionel Messi chuan Argentina tana inlan hnem ber Javier Mascherano a nih rual a, world champion vawi hnih ni tawh tan match 147 a khel tling ta - Copa America 2021 khelh chhung ngeiin a khum ang.
Nimin zing khan Argentina hian Paraguay chu 1-0 in an hneh, South America ram 10 inelnaah hian quarterfinal an lut. Group A aṭangin Chile pawhin point nga hmuin knockout stage an lut chiang ve bawk.
Goal khat a tawk
Estadio Nacional de Brasilia-a inkhelah Lionel Scaloni-a'n chak tumin a naute a remkhawm. Sergio Aguero chu tun inelna bika a vawi khat nan bul ṭantir a ni a, ani thlawp tur hian Angel di Maria, Messi leh Alejandro Dario Gomez te an awm.
Minute 10-na lekah Messi-a’n mual laiah ball a chang, amah vengtu lak aṭanga a tal pit hnuah Di Maria a pe a, Paris Saint-Germain forward hian box chhungah Gomez tan a lir lut; Sevilla striker hian mawi taka keeper chip khumin goal awmchhun a khung.
Chakna goal khungtu Gomez chuan, “Angel khan ball ṭha bik min pe a, ka hna chu awlsam taka lo khung mai kha a ni. Kan thiante hnen aṭanga thlawpna kan dawn ṭhat chuan hnathawh a awlsam,” tiin a goal khung chu team hnathawh a nih thu a sawi.
Copa America 2019 final-ah Argentina hi an chak lo, a hnu lamah erawh match 16 chhung chak loh nei loin an kaltluang ta. An kaltluan theih chhan hi tlarhnung lam an rem phui theih tak vang niin a hriat theih.
Nicolas Otamendi chu rinrawl a ni a, a kawppui turin Atalanta defender Cristian Romero leh German Pezzella te an awm. Paraguay lakah Otamendi chu awltir niin Romero leh Pezzella ten tlin takin an hna an thawk.
Match 147-na
Argentina coach Lionel Scaloni-a’n player a siksawi nasa a, an group match pathumnaah hian Messi chu a hahchawlhtir mai pawh a rinawm hman. Mahse, a captain hi ram tana inlan hnem ber ni thei turin khelmualah a luhtir.
Scaloni chuan, “Messi hian kan match zawng zawng a la khel kim vek, hahchawlh pawh a phu hle. Mahse kan mamawh a, kan duh leh mamawh chhanna chu ani hnen aṭang hian kan hmu zel,” tiin a sawi. Match thum an khelh tawhah Messi hi an chakna hnar a la ni vek.
Messi chungchang sawi zawmin Scaloni chuan, “Ni thum danah match khelh zel a ngai a, a kum nena chhut phei chuan hahdam a mamawh. Chutih rualin ram tana hlawhtlin châka tuihal a ni,” tiin a player pawimawh chuan inkhelh tam a duh thu a sawi.
Barcelona captain Messi hi kum 33 mi a ni tawh a, an group match hnuhnung ber an khelh hunah chuan an hahchawlhtir a rinawm. June 28, Thawhṭanni zingah an group a hniam ber Bolivia nen an inhmachhawn leh ang.
Argentina hian Copa America 1993 title an lak hnuah nomawi liam tham chawi an la nei leh lo. Copa America final an luh hnuhnung pathumah an chak lo vek, tun ṭumah hian Messi hoin champion ngei an tum, captain hian ram tana inlan hnem record siam bakah chak ngei a duh dawn.
Chile an tlang
Luis Suarez leh Edinson Cavani awmna Uruguay-in goal an la khung thei lo. World champion hmasa ber hi Chile nen 1-1 in an inhnehtawk, Chile striker Eduardo Vargas-a goal khung chu Chile captain Arturo Vidal-a’n anmahni lamah tilut palhin a sut a, team pahnihin point an insem.
Chile hian tlang tura an mamawh zat point an hmu a, khelh hmabak pakhat nei chungin quarterfinal an lut. Uruguay erawhin match hnih aṭangin point khat chiah an la neih avangin khelh hmabak pahnih an la neihah chetsual a thiang tawh lo.
Chile captain Claudio Bravo chuan, “Minute 90 chhung khan kan goal nawr a na tawk lo. Amaherawhchu kan mamawh zat point kan hmu thei a, knockout stage kan luh bawk avangin lawmna tur a tam zawk,” tiin a sawi.
Point khat chauh la nei Uruguay hian Bolivia leh Paraguay an la hmachhawn ve leh thung dawn a, group pakhat aṭangin team pali in quarterfinal an luh dawn avangin an tan kawng a la inhawng zau hle. Vawi khat chak pawhin an la tlang thei tihna a ni.
Results & Fixtures
Argentina 1 - 0 Uruguay
ARG : Guido Rodriguez 13'
Uruguay 1 - 1 Chile
URU: Arturo Vidal 66' (OG)
CHI: Eduardo Vargas 26'
June 23, Nilaini Zan Ecuador 02:30 AM Peru
June 24, Ningani Zing Colombia 05:30 AM Brazil
June 24, Ningani Zan Bolivia 02:30 AM Uruguay
June 25, Zirtawp Zing Chile 05:30 AM Paraguay
June 27, Pathianni Zan Brazil 02:30 AM Ecuador
June 27, Pathianni Zan Venezuela 02:30 AM Peru
June 28, Thawhṭan Zing Uruguay 05:30 AM Paraguay
June 28, Thawhṭan Zing Bolivia 05:30 AM Argentina
