Hri kai 140 an tling tawh

Copa America 2021 khelh laiah coronavirus kai mi 140 zet an hmuchhuak tawh a, hri leng endikna hi a khat tawkin uluk taka kalpui reng a nih thu South American Football Confederation chuan an sawi.

CONMEBOL tarlan danin mi 15,235 an endik tawh a, endik zat aṭanga chhut chuan hri kai hi 0.9% an ni; inelna neih chhung zawng chuan team leh tournament kaihhnawiha hnathawkte chu an endik zel ang.

South American football thuneitu chuan thuchhuah siamin, "Hri kai tam ber hi hnathawktute an ni a, player leh coaching staff zingah chuan hri vanga buai an awm meuh lo. Thil engkim hi fimkhur tak chungin a ṭha thei ang bera kalpui a ni," an ti.

A tirah chuan Copa America hi Argentina leh Colombia ten an inthlen ṭawm tur a ni. Mahse ram pahnih hian hri leng vangin an thleng thei lo a, hun chawpchip takah Brazil kutah hian an hlan.

Nimin tlai thleng khan Brazil ramah hian Covid-19 kai mi 17,969,806 an awm tawh a, khawvel pumah hri kai tam lamah pathumna an ni; an chungah hian United States leh India an awm.