CSL chhunzawm hun an sawn

Tun kar aṭanga khelh chhunzawm tura tih ni mah se Chinese Super League chu an la khel thei rih lo. League an chhunzawm rih loh chhan hi 2022 World Cup qualifier khel player ṭhenkhat khunghran an la nih vang a ni.

Ruahman lawk dan chuan thla khat an chawlh hnuah CSL hi Thawhṭanni aṭanga khelh leh tur kha a ni. Vawi riat champion tawh Guangzhou FC leh Chongqing Athletic an inkhel ang a; Qingdao FC leh Henan Longmen an inhmachhawn bawk ang.

Mahse, Chinese Football Association (CFA) chairman Chen Xuyuan chuan, "Super League kalphung hi a hran bika ngaihtuah a ngai, league thuneitu mai bakah club lam nen inbiak rawnna neih a ni a, kan remtih tlan dan anga kalpui a ni," a ti.

CSL hi engtik hunah nge an khelh chhunzawm dawn tih an la sawi chiang thei lo. Tuna a lan dan chuan July thla tawp lamah chuan khelh leh theih tura beisei a ni.