Villa-ah Young a kir

England international Ashley Young chu tun hma lama a khelh tawhna Aston Villa-ah a kir. Villa Park-ah hian season khat chhung cham turin contract a ziak a, kum khat dang atana pawhsei leh theih tur niin an sawi.

Kum 35 mi Young hian 2007-2011 chhung khan Villa tan a lo khel tawh, chumi hnuah Manchester United panin captain armband a hreng phak hial. A vanglai a pelh hnuah Inter Milan pan lehin season liam ta khan Antonio Conte kaihhruaina hnuaiah Serie A nomawi a chawi leh bawk.

Aston Villa manager Dean Smith chuan, "Ashley hian club leh ram tan inelna lian leh sang a hmachhawn tawh a, a tawnhriat tam tak nen Villa a rawn pan leh thei hi a lawmawm hle.

"Kan hnen a rawn pan hma hian ngun takin kan inbia a, hmun hran hrana khel thei a nihna hi a ṭangkai dawn. Khelmual chhung bakah a pawn lamah a tawnhriat neih ṭhat hi kan chhawr dawn a ni," tiin a sawi.

Young hian July thlaah kum 36 a tling tawh dawn a, season tluana rinrawl tur chi a ni tawh lo. Amaherawhchu club lian lamah tawnhriat a nei hnem tawh a, hmasawn tum Villa tan chuan mi pawimawh a la ni thei ang.