Man City-in Kane lei tumin an dawr

Manchester City chuan Harry Kane lakluh an tum ngei a, hmalakna hmasa atan Tottenham an dawr tawh. England captain manah hian pawisa bakah player pek tel an huam, a belhkhawmin pound maktaduai 100 hu velin an dawr.

Sergio Aguero chhuah hnuah Man City hian amah thlak tur striker dang an la nei lo. Kane bakah hian Borussia Dortmund striker Erling Braut Haaland an ngaihven, tun nipui chhungin a tu emaw zawk chu an lakluh a rinawm.

Kum 27 mi Kane hian Spurs chhuahsan a duh thu a sawi tawh, nomawi chawi theihna club zawm a duh thu a sawi bakah Kevin de Bruyne chu player dangte pawhin khelhpui an chak a nih thu a lo sawi tawh bawk.

Season hmasa Premier League goal 23 khungtu hian a lan dan chuan Pep Guardiola hnuaia khelh a hreh lo. Chutih rualin Spurs lam hian awlsam takin an striker ṭha hi chhuahtir mai an tum bik lo.

City hian player lei nan sum an hmang hnem a, mahse player pakhat lei nan pound maktaduai 65 aia sang an la seng ngai lo thung. Kane lei tur erawh chuan an sen tam a ngai dawn tih a chiang a, indawrna hi a kal chhunzawm zel ang.

Man City hian pawisa bakah Raheem Sterling, Aymeric Laporte leh Gabriel Jesus te zinga tu emaw ber pek tel an phal nia sawi a ni. Player hming tarlan pathum hi man tam tham tak vek an nih avangin club pahnih indawrna a sum che vel hi a tam dawn.