Duhtak Denmark, I chungchang thu ropui takin an sawi e!

Mizo mi ropui J. F. Laldailova lehlin ngaihnawm, William Shakespeare-a kut chhuak Hamlet thawnthu aṭanga Mizo ten kan hmelhriat Denmark chuan thawnthu ngaihnawm min chhawpsak leh ta.

Thawhṭanni zan khan point hmuh la nei lo Denmark chuan Russia chu 4-1 in an sawp a, inkhel lehlamah Belgium-in 2-0 a Finland an hneh bawk avangin point thum nen Denmark-in Euro last 16 an inpetkai.

Denmark tan Mikkel Damsgaard, Yussuf Poulsen, Andreas Christensen leh Joakim Maehle-ten goal khat ṭheuh an khung a, Russia tana Artem Dzyuba penalty goal-in inkhel result a thlak danglam phak lo.

Point kua hmu chungin Belgium an tlang a, Denmark, Finland leh Russia-ten point thum ṭheuh an hmu a, an pathum intum kualna en a nih hnuah goal difference hmangin Denmark an tlang.

Min hrilh leh rawh
June 12, Inrinni zan a ni - Copenhagen khawpuiah Denmark-in an hneh ngei tura ngaih Finland an hmachhawn a, inkhel an thunun vanglai takin an thiampuipa Christian Eriksen chu nikhaw hre loin a tlu. Inkhel chu tihtawp lailawk zui a ni.

Danish player an mangang a, a ṭhen an ṭawngṭai a, a ṭhen an ṭap a! Eriksen zawnchhuah a ni a, an thinlungah zawhna tam tak a awm. An ṭhianpa chu a dam leh ang em? Dam leh ta pawh ni se, a inkhel leh thei ang em? A chhanna pe theitu an awm rih lo.

Rilru chavai taka football khawvelin Copenhagen khawpui a thlir lai chuan Eriksen a harhchhuah thu hriat a ni a, Denmark hi duhthlan tur pathum pek an ni - inkhelh chhunzawm, a tuka an khelh hmabak minute 50 khelh chhunzawm, inkhel tawh loa 3-0 a tlawma puan, tihte a ni.

Denmark-in duhthlan tur an nei chhe takzet a, huaisen takin inkhelh chhunzawm an thlang. Rilru khingbai tak chungin an khel tawh miau a, team tenau zawk Finland lakah 1-0 in an tlawm.

Beiseina chu
Eriksen-a'n ṭhat lam a pan thu hriat a ni a, media hrang hrangin an ṭhianpa talbuai laia an ṭawiawm danah Danish team fakin Denmark chanchin an ṭial a, Euro titi luahtu chu Eriksen leh Denmark an ni.

Mahse, fel em vang leh nungchang mawi vanga Euro hi khelh chi a ni lo a, thleng sang tur chuan khelmualah hnehna chan a ngai - Denmark-in awlsam ber tura ngaih Finland an hneh lo tawh a, an hmaa inchhawp chu world number 1 Belgium leh Russia an ni.

Denmark-in Belgium lakah football hmuhnawm an chhawpchhuak a, minute hnihna lekah Yussuf Poulsen chuan goal hmahruai a khung - mahse, Denmark ke a hmui tlat lo a, goal dang an khung thei lo.

Belgium erawhin bench aṭangin Kevin De Bruyne leh Eden Hazard te an la luhtir thei a, Eriksen a awm loh hnua a thlak zotu nei lo Denmark nen an squad a inchhah hleih hret. A tawpah 2-1 in Belgium an chak.

A tawpah a changtupa!
Thawhṭanni zana group B inkhelh hma hian Belgium-in point ruk an nei a, Finland leh Russia ten point thum ve ve an nei a, a mawngphahah point la nei lo Denmark an awm.

Mahse, he Danish team huaisen hian an ram mipui puihna nen beiseina an nei tlat - an chak a, Belgium-in Finland an hneh bawk chuan an tlang thei tih an hria a, beidawnna aiin beiseina chu an chawi langsar lui tlat.

Parken Stadium-a mipui 20,000 chuang puihna nen Denmark an phur a, minute 38-naah rawlthar ṭhangduang Damsgaard-a'n goal a rawn khung nghal - kum 20 mi Sampdoria forward hi lo chhinchhiah rawh.

Denmark-in goal an khung tam leh an dinhmun a ṭha dawn tih an hai lo a, an nawr chhunzawm reng - minute 59-naah Roman Zobnin backpass sual zar zoin Poulsen chuan a khung ve leh a, 2-0 a ni.

Sorry, Dzyuba!
Denmark phur vanglai takin, minute 70-naah Dzyuba-a'n Danish mipui a ngawihtir a, penalty hmangin Russia tan goal-a rawn khung ṭhen - Russia tana goal khung hnem ber record a nih rual.

Kum 32 mi striker hian Russia tan match 55-a khelhah goal 30 a khung a, Russia tana heti zat goal khung thei dang chu Aleksandr Kerzhakov chiah a ni. Sevilla tan pawha lo khel tawh Kerzhakov hian ram tana match 91 a khel thung.

Denmark team an tumah an chiang a, Dzyuba goal-in Russia a ben harh zawh loh rualin Denmark a beng dai zo lo - Christensen leh Maehle ten goal khat ve ve an khung leh a, 4-1 a chakin last 16 an lut.

Parken Stadium a su dulh dulh a, Danish fan-te lawmna chu thua sawifiah chi a ni lo. Eriksen a tluk ṭuma mittui nena media-te hmachhawntu, Denmark manager Kasper Hjulmand pawhin fan-te nen an chak a lawm a, a mittui luan chhan erawh a dang ta.

Lukaku telna Belgium an chak
Belgium-in Finland laka hnehna chang turin harsatna an tawk lo a, Thawhṭanni zan khan Teemu Pukki-te ram hi 2-0 in an hneh.

Finland-in last 16 lut turin draw result a tawk thei tih an hria a, hei vang hian world number 1 laka nawr pup pup chi a ni lo tih hriain tlarhnung lam ven uluk an thlang - an tumah an chiang a, an ruahmanna an hlawhtlinpui teuh hle.

Mahse, Belgium-in an nawr na miau a, minute 74-naah an khung ta nge nge - Finland keeper chhuanvawr Lukas Hradecky-a'n an lama a tih luh a ni. Belgium tan corner aṭanga ball kal chu Thomas Vermaelen-a'n a lo tauh a, J League club Vissel Kobe defender ball tauh hian goal 'bar' leh 'post' inzawmna lai tak a fuh - a per lehlam chu Hradecky hian a kutin a tawk fuh a, an lamah a lut daih!

Belgium tan Lukaku chuan minute 81-naah an goal hnihna a khung ve leh a, Kevin De Bruyne siamsak a ni - Lukaku hi offside vangin a goal khung pakhat chu pawmsak a ni lo bawk. World number 1 team tana Jeremy Doku leh Eden Hazard te shot chu Bayer Leverkusen keeper Hradecky chuan ṭha zetin a dang ve ve bawk a, a tawpah chak phu zawk Belgium an chak.

Belgium fan-ten inelna ṭan dawna 100% fit lo Eden Hazard leh KDB inkhel an enin an hlim ang tih a chiang a, Lukaku a la awm cheu bawk avangin he team hi champion turin an ṭha tawk.