North Macedonia lakah Netherlands an chak nuamsa

Group C-ah point ruk hmanga hmahruaitu an ni chiang tawh chungin Netherlands-in tla tawh North Macedonia lakah an neih ṭhat players an thawhchhuahpui a, 3-0 in an chak.

Johan Cruyff Arena-a inkhelah hian Memphis Depay chuan minute 24-naah goal hmahruai a khung a, he goal a luh theihna tura Dutch team counter attacking football chu a hmuhnawm takzet.

Netherlands penalty area-a Daley Blind-a tackle aṭanga ball kal chu Memphis Depay-a'n a tlan luhpui a, Donyell Malen a pek hnuah Malen hian a pe let leh a, Depay-a'n harsa lo takin goal-ah a chantir.

Barcelona player thar Depay hian Netherlands tana a match hnuhnung 10-ah goal kua khungin assist vawi thum a nei tawh a, Barca ṭantute chuan a che tla lai vel kha chu en nuam an ti khawp ang.

Netherlands-in goal dang an khung lawk lo a, minute 51-naah captain Georginio Wijnaldum kan hmu - Barcelona-in an rim, Paris Saint-Germain pan thlangtu midfielder hian Depay-a cross duhthusam chu awlsam takin goal-ah a chantir.

Minute sarih a liam a, Wijnaldum bawk kan hmu. Depay-a shot, Macedonian goalkeeper Stole Dimitrievski-a dan per chu Liverpool midfielder hlui Gini ke bulah tak a tla a, awlsam takin a goal hnihna a khung.

Netherlands-in hnehna chang turin harsatna an nei lo a, chutihrual chuan an tlarhnung a nghin leh ṭhin avangin inenfiah erawh an mamawh. North Macedonia goal hnih khung chu offside vangin pawmsak an ni lo a, Aleksandar Trajkovski chuan post a pet per bawk.

Goran Pandev chuan North Macedonia tana a match hnuhnung ber a khel a, ram tan match 122 inlanin goal 38-a khungsak hman - ram tana inlan hnem ber leh goal khung hnem ber record a chelh.

Serie A club Genoa striker hi kum 37 mi a ni ve tawh a, minute 69-naa lakchhuah a nihin Macedonia player-ten guard of honour an pe a, Austria laka 3-1 a an tlawm ṭuma goal a khung khan ram tana major tournament-a goal khung hmasa ber a ni bawk.