Zaninah Germany vs Hungary : Thil eng pawh a thleng thei - Matthaus

1990 FIFA World Cup-a Germany champion puitu player pawimawh Lothar Matthaus-a'n zanina Germany leh Hungary inkhelh hunah thil engpawh a thlen theih thu a sawi. Zanin dar 12:30 hian Allianz Arena-ah Germany leh Hungary ten Euro 2020 group match hnuhnung ber an khel dawn a, inkhel pawimawh a ni.

Germany tan last 16 lut turin Hungary laka point hlawhchhuah a tawk a, Joachim Low te tan hna harsa niin a lang lo. Amaherawhchu group C-ah pawh Ukraine tan tling chiang turin Austria lakah point hlawhchhuah a tawk a, an chak tak loh avangin Andriy Shevchenko hote hi team dang result-ah an innghat mek.

Lothar Matthaus chuan, "Hungarian mipuiin stadium khat tlaka inkhel an thlir kha hmuh nuam ka ti. Kum 15 liam ta khan Hungary team ka enkawl tawh a, thil a inthlak nasa tawh hle," tiin a sawi. Germany leh Bayern Munich legend Matthaus hian kum 2003-2006 chhung khan Hungary team hi a enkawl.

Kum 60 mi Matthaus chuan sawi chhunzawmin, "Marco Rossi hote hian goal venhim hna an thawk dawn a, Germany-in na takin a nawr ang. Hungary team inlungrualna hian team pahnih inkar zau tak hi an ti zim thei a, Germany hi rinkai ni mah se football-ah chuan engpawh thleng thei a ni," tiin a sawi.

Germany hian Hungary nen an inkhelh hunah hian Thomas Muller an chhawr thei dawn lo a, Bayern Munich forward hi Portugal nen an inkhelh ṭumah a chet ṭhat avangin Low-a hote tan channa nasa tak a ni thei. Chutihrualin player ṭha dang tan theihna lantirna hun remchang a ni thei bawk.

Muller aiah hian Bayern Munich tana a khelhpui Leroy Sane a rawn inlan a rinawm a, player dang a thlak a nih chuan Leon Goretzka pawh lut thei zinga mi a ni ang. Bayern midfielder Goretzka chu match hmasa berah inhliam vangin a khel thei lo a, match hnihnaah bench aṭanga lutin a khel chhe lo.

Germany coach Joachim Low chuan, "Portugal nen khan rang takin ball kan inpe kual a, amaherawhchu Hungary hian player pakua vela goal venhim hna an thawh chuan a harsa dawn. Counter attack-ah an hlauhawm tih kan hria a, kan fimkhur a ṭul ang," tiin a sawi.

Hungary-in khualmualah an khelh a ṭul dawn a, chutihrualin Germany tan dahniam chi an ni lo. Marco Rossi hote hian France lakah point khat an hlawhchhuak a, vanneih ṭum ni se point thum hmu thei an ni a, Portugal nen pawh point hmuh an phu hle. Hungary coach Marco Rossi chuan Munich-ah an game ṭha bera anga an khelh theih a beisei a, tun inelnaa an khelh tawh dan thlirin football hmuhnawm a beisei theih ang.