Switzerland a tling, tu nge zui dawn?

Switzerland-in Euro 2020 group match hnuhnung berah Turkey 3-1 in an hneh a, last 16 lut turin an nghah rih a ṭul. Thawhṭanni zan khan group B leh C ten group match an khel zo a, Switzerland-in last 16 an khel dawn tih a chiang.

Tun ṭum inelnaah hian team 24 an tel a, team 16-in group stage an paltlang dawn a, team pariat an tla dawn. Chumi awmzia chu a sang pahnih bakah pathumna zinga ti ṭha pali an tling dawn.

Group match khel zo tawh zingah Switzerland-in point li an hmu a, an hnuaia awm group B leh C pathumna Finland leh Ukraine ten point thum ve ve an hmuh avangin an tling. Finland leh Ukraine te goal difference hi -1 leh -2 a nih bawk avangin group dang aṭanga pathumna hmanga tlang turin point thum leh goal difference negative loh a tawk.

Nimin thleng khan team 11 - Italy, Wales, Switzerland, Belgium, Denmark, Netherlands, Austria, Czech Republic, England, Sweden leh France ten last 16 an lut tawh a ni.