I League-ah Mohun Bagan an champion

Kumin kumtirah Mohun Bagan leh ISL club ATK inzawm tur thuin India ram football titi a luah hneh a, kum 130 laia upa Bagan ṭantute tan mangchhia tia sawi theih a ni. Tunah erawh  Mariners tan chanchin lawmawm a thleng a, Thawhlehni zan khan Aizawl FC 1-0 a hnehin I League-ah an champion.

Kalyani Municipality Stadium-ah Bagan forward Papa Babacar Diawara-a'n goal awmchhun a khung a, match li khelh hmabak awm mah se Mariners hi an hnuai chiaha awm an hmelma East Bengal-in an umpha thei tawh lo. 

Aizawl FC chu 2016-17 season khan beisei phak bakin Khalid Jamil hnuaiah an che ṭha a, April 2017 a thlen meuh phei chuan champion rim a nam ṭan tawh. April 23, 2017-ah Mizo club-in Mohun Bagan an mikhual a, hnehna an chang a nih chuan champion turin point khat chiah an mamawh tawh dawn.

AFC an phur a, Mizo mipui an phur a, tun hma zawnga cho phak loa ngaih ṭhin Mohun Bagan hneh tumin si rukin lain an thawk chhuak. Khawchhe hnuaiah RG Stadium leh a chhehvel a khat vek a, champion inbeisei pahnih AFC leh Bagan ten football hmuhnawm an pho chhuak. Mizo tlangval Zohmingliana Ralte-in minute 83-naah chakna goal a khung.

aṭanga I League club hmasa ber Lajong lakah point khat hlu tak hlawh chhuakin India ramah an champion a, Khalid Jamil-a hoten nomawi an chawi dan an thlir kir apiangin Bagan an hneh ṭum an hre chhuak ziah ang. Chutiang chiah chuan Kolkata club tan pawh Aizawl FC laka an ser nung hi tih reh theih a ni dawn lo.

Mohun Bagan hian Jeje Lalpekhlua hoin 2014–15 season khan I League nomawi chawi tawh mah se Aizawl FC laka hun ṭha an bawhpelh hnuah Minerva Punjab leh Chennai City ten nomawi an chawi khalh. Kuminah erawh Spanish manager Kibu Vicuna hoin Bagan an kal fawr a, season chanve khelh chhoh aṭangin champion tura rinkai lawrlak an ni tawh.

Bagan duhthusamin thil a thleng a, an mualah ngei champion nemngheh theihna hun ṭha a inhawng a, an khingpui Aizawl FC an ni chiah bawk. Mariners champion lai thlir tumin mipui 17,222 zet an pungkhawm a, tun season-a Kalyani Municipality Stadium-a mipui punkhawm tam ber ṭum a ni.

Standly Rosario kaihhruai Aizawl FC-in tlarhnung an remphui ṭhat avangin Mohun Bagan hna a awlsam lo. Mizo club tan Rochharzela'n first half-ah chance ṭha ṭum hnih a nei a, Kolkata club ṭantute thin thiin an awm lo.

First half-ah goal a luh loh hnuin halftime-ah Kibu Vicuna chuan, "Tun hi in tan hun pawimawh tak a ni thei a, in kutah engkim a awm. Ka ringtawk che u a, min ṭantu mipui hmaah sawn tu nge kan nih lantir ang che u," tiin a naute a fuih a, second half-ah Bagan goal nawr a na sawt.

Minute 80-naah Bagan midfielder Joseba Beitia chuan ṭha zetin ball a la lut a, Spanish midfielder hian  Papa Babacar Diawara pein, Senegalese striker hian kawh zetin a pet goal. Aizawl FC tan siphurh sutna hun la awm mah se Bagan-in mipui sing chuang thlawptu an neih avangin a tawp thlengin an ṭang tlang a, 1-0 in hnehna an chang.

Mohun Bagan-ah hian Mizo pathum Lalramchullova, Lalramzauva leh Lalchhawnkima te an awm a, Aizawl FC champion ṭuma defender pawimawh Chullova hi inhliam vangin khel tam lo mah se squad-ah a awm vek.

Chullova chuan, "Tun season chu Pathian zar liau liau a ni. Kan khelh ṭhat loh ṭumah pawh kan chak leh ṭhin a, champion chiangin lang mah ila Pathian awmpuina kan dawng. Aizawl FC nen match hmasa ber kan khelh ṭum khan ka inhliam a, coach duhsakna dawngin hliam neuh neuh ka nei ṭhin chungin squad-ah min dah zel a, ka lawm takzet," tiin Vanglaini a hrilh.

Mohun Bagan hian tun Pathianni dar 5:00 hian East Bengal an hmachhawn nghal dawn. Chullova chuan sawi chunzawmin, "Team thuneitute an lawm em em a, amaherawhchu Kolkata Derby a awm avangin lawm chiam a la rem lo.  East Bengal nena kan inkhel tura rilru pe turin team hotuten min duh," tiin a sawi a, Kolkata Derby hi a tawpna ber a nih theih avangin an ngai pawimawh hi a mak lo.

I League champion tawhte

Season    Champion

2007–08    Dempo

2008–09    Churchill Brothers

2009–10    Dempo

2010–11    Salgaocar

2011–12    Dempo

2012–13    Churchill Brothers

2013–14    Bengaluru

2014–15    Mohun Bagan

2015–16    Bengaluru

2016–17    Aizawl FC

2017–18    Minerva Punjab

2018-19    Chennai City

2019-20    Mohun Bagan

Mohun Bagan hi kum 1939 khan a vawi khat nan Calcutta Football League-ah an champion a, kum 2018 khan a vawi 30 nan an champion. Durand Cup-ah vawi 30 nomawi chawi tawhin an hmelma East Bengal nen champion ngun ber an ni a, 2000–01 season-a tih tawp tak Rovers Cup-ah pawh vawi 14 nomawi chawiin champion ngun ber an ni bawk.

Federation Cup-ah Mariners hi vawi 14 champion-in record chelhtu an ni a, IFA Shield-ah vawi 22 lai nomawi an chawi tawh. I League awm hmaa India rama inelna sang ber National Football League-ah vawi thum an champion a, tun ṭum hi I League-a an vawi hnih nomawi chawina niin India ram champion ṭum nga an nihna chiah tiin a sawi theih.