England-in hnehna hlado nen last 16 an lut

Raheem Sterling-a bana tattoo inziak chu jersey number 10 ha naupangin Wembley Stadium a thlir lai a ni a, he tattoo hi Sterling-a beiseina tarlanna a ni.

Wembley chhehvelah 'pem thar' naupang niin Jamaican mi Sterling hi a seilian a, an retheih dan enin he naupang tan hian Wembley chu 'mumang' mai a ni a, a sang lutuk.

Mahse, hei tak hi hringun mawina chu a ni - mi tling lo ber pawhin a sang ber a beisei thei a, hmanni lawka a hnuai bera awm kha a chung berah a awm thei tlat.

Thawhlehni zan khan Raheem Sterling-a'n an 'in' bul Wembley Stadium-ah England tan goal a khung a, Three Lions hi Czech Republic lakah 1-0 in hnehna a chanpui - group D hmahruaitu ni chungin Euro 2020 last 16 an lut.

Thutlukna mak
England boss Gareth Southgate-a'n Croatia leh Scotland an hmachhawn ṭumin thutlukna mak tih hlawh a siam tawh a, Czech lakah pawh English coach player rem danin mak tih a hlawh.

Scotland midfielder Billy Gilmour-a'n Covid-19 a kai a, a lo awm hnaihtu Mason Mount leh Ben Chilwell chu inkhunghran tir an ni a, player inthlak danglam chu a awm dawn tih a chiang sa.

English mipuite duh rawn Jack Grealish-a'n bul a ṭan ve ta nge nge a, chutihrual chuan Jadon Sancho tan hmun a la awm lo - ani hi season hman zawh taka Borussia Dortmund tan match 38-a goal 16 khunga assist vawi 20 neitu a ni.

Southgate-a'n squad-ah Phil Foden a dah lo a, kum 19 mi Bukayo Saka a luhtir thung - tlarhnungah Harry Maguire a lo kir a, John Stones, Kyle Walker leh Luke Shaw-te dinpuiin Three Lions-in he tlarhnung hi an rin chhunzawm a nih pawhin a mak lo ang.

Hello Saka
Saka-a'n season hman zawh takah Arsenal tan match 46 zet khel mah se Thawhlehni zan hmaa England tana a inlan zat chu match li chauh a ni a, Czech laka bul a ṭan hian mak tih a hlawh.

Mahse, Arsenal rawlthar duhawm hian international football-a vul turin theihna a nei tih a pholang a, minute 12-naa Sterling-a goal khung thawk chhuaktu a ni a, Czech tlarhnung a chhaih mangan hnuah Grealish hnenah ball a pe.

Aston Villa captain hian Sterling-a tana duhthusamin ball a pe phei a, Manchester City forward tan khung loh chi a ni lo - he goal luh nana tlarhma player pathum inthlawp dan hi England fans tan chuan hmuh nuam a tling ang.

Euro-a bul an ṭan hmasak berah Saka leh Grealish-ten hmuhnawm khawpin an khel a, Czech laka an khelh dan en chuan bul ṭan zel an phu - thutlukna siam tur erawh Southgate a ni.

England tan lawmna
Three Lions tan tlarhnungah Harry Maguire a lo kir ta a, Manchester United captain lo kir hi England fans tan chuan thu lawmawm a ni - tlarhnunga an mamawh tawnhriat nei ṭha defender leh hruaitu an neih belh.

Hei mai a ni lo - Maguire hi tlarhnunga riak reng loin a tlan chhuak ngam a, pass pawimawh nei tumin ball a keng ngam a, hei hi England-in an mamawh chu a ni.

Hliam dam kawr chunga hruai Jordan Henderson chu second half-ah Declan Rice thlakin luhtir a ni a, Liverpool captain hian goal-a khungah inngai mah se offside vangin pawmsak a ni lo.

Southgate-a'n stage sang chinah eng ang takin nge thutlukna a siam dawn hriatthiam a harsa a, Hendo dam reng chungin Kalvin Phillips leh Rice-a inkawptir reng ang em, tih chu zawhna awm a ni.

England tan buaina!
Three Lions chanchin sawi chuan captain leh striker chhuanvawr Harry Kane sawi hmaih theih a ni lo a, goal khung tura luhtir berin goal a la khung miau loh avangin England tan chuan mangan a hun tawh.

Tottenham Hotspur striker hian chance duhawm chu a nei ngei a, mahse, keeper Tomas Vaclik-a'n ṭha takin a dansak - inkhel ṭantir lamah Kane hian goal a khung ve mai rinna lian mah se inkhel a rei tawlh tawlh a, Kane kan hmu tlem tawlh tawlh!

Kane hian a khelh mekna Spurs thuneitute hnenah chhuah a duh thu a sawi tawh a, Manchester City chuan pound maktaduai 100 bawr velin lakluh an tum mek - transfer thu leh hlain Kane ngaihtuahna a tibuai em ni, tih chu zawhna awm thei a ni.

Southgate-a'n inelna ṭan hmain final luh an tum tur thu a sawi a, he a thusawi a thlen dik nan chuan a world class striker hi a ngawih reng a thiang lo - England tan thleng sang turin Kane chet ṭhat a pawimawh.

A phena lawmna
England-in last 16-ah 'group of death' tia sawi, Germany, France leh Portugal awmna group F-a pahnihna an tum dawn a, he thuziak i chhiar meuh chuan he ram pathum zinga an tum tur ber hi a chiang tawh ang.

Round of 16 aṭangin Three Lions hmabak a hautak nghal dawn tihna a ni a, hei vang hian Kane 'form' an mamawhna a zual. Chutihrual chuan he team hian an striker chhuanvawr 'form' lo chunga last 16 an lut thei a nih chuan 'engemaw' chu an nei tih a chiang.

Euro ṭan dawnah England tlarhma an sawi vul chuk a, tuna fak phu erawh tlarhnung an ni - group stage match thumah goal an chhuah miah lo a, group match khel zo tawh zingah Italy nen chiah goal chhuah loa last 16 lut an ni.

Mahse, he English team hian match thumah bul an ṭan ṭha vek chungin an zuih vek a, hei hi Southgate-a tan ngaihtuahna sen tharna tur niin a lang - June 29 zanah last 16 an khelh nghal dawn avangin a ngaihtuah ran a ngai ang!

Attacking football hmuhnawm phochhuah ngei kan duh a, ka player-te inzawt a nih pawhin hemi chungchang hi chu kan sawi nasa a ni. Mahse, area ṭhenkhatah hian kan fitness a lang tawk lo ṭhin a, kan hriam tawk lo leh ṭhin. Kan inkhel rei tawlh tawlh a, chu chu a tawpah kan buai phah ta ṭhin reng a ni. Tun dinhmunah chuan kan tlarhnung a phui ṭha em em a, kan duh angin goal la khung tawk lo mah ila goal kan la chhuah lo hi a pawimawh lai chu a ni. - Gareth Southgate, England manager

Tawnhriat duhawm tak a ni a, Wembley hi kan chenna ṭhin bul lawka awm a ni a, a vawi khat nana he hmuna ka inkhel thei hi ka lawm takzet. Ka hming lama fan-te an zaite kha ava nuam tak em! - Bukayo Saka, England forward

Foden-a khelh loh chhan
England tan Phil Foden chu squad-ah pawh a awm lo a, match hmasa pahniha bul ṭantu forward hming lang lo hian fans tam tak a barakhaih. Mahse, Southgate chuan squad-a Manchester City forward a telh loh chhan chu tactical lam ai mah chuan fimkhur vang a nih thu a sawi.

England coach chuan, "Phil hian yellow card vawi khat a hmu tawh a, player dang pahnih chan thei renga kan awm bawk avangin fimkhur a ngai a ni," a ti. Euro 2020-ah hian player pakhatin yellow card vawi hnih a hmuh chuan an match khelh leh turah a inlan thei lo a, Southgate-a'n yellow card vawi khat hmu tawh Foden lakah fimkhur a ṭul zawkin a hria.

England squad-ah hian Mason Mount leh Ben Chilwell chuan Covid-19 kai thar Scotland midfielder Billy Gilmour chu an lo hnaih fal deuh a, an inkhunghrang mek. Player pahnih hian last 16 an khelh a rinawm loh a, Southgate-a'n player pahnih chan tawh hnuah hliam vang pawh ni loa player dang chan belh a duh lo.

Southgate chuan, "Mount leh Chilwell te inkhung-hran hun chhung hi last 16 kan khelh zanah a tawp dawn a, eng tiang takin nge an training theih dawn leh eng thil nge thleng dawn kan la hre lo. "Mahniin training chu an nei thei ngei ang a, group training hnaihchilh lutuk loa an zawm theih hun a awm leh bawk. Chuvang chuan player pahnih tan last 16 khelh hi chu a harsa ang," tiin a sawi.

Hmabak hautakin England a hmuak
Nizanah group of death tia hriat lar, group F an inkhel zo ve chauh a, he group-a pahnihna hi group D hmahruaitu England-in last 16-a an hmachhawn tur an ni.

He thuziak i chhiar meuh chuan France, Germany leh Portugal aṭangin England-in an tum tur a chiang tawh ang a, hmachhawn châkawm lo vek an ni - hei vang hian England vs Czech inkhel pawh kha beisei anga a 'hot' loh ringtu tam tak an awm.

Mahse, England-in hnehna an chan avangin Wembley Stadium-ah last 16 an khel thei dawn a, Southgate chuan hei hi an duh ber a nih thu a sawi. England coach chuan, "Wembley-a inkhel tura group hmahruaitu nih kha kan duh a ni. Kan khelmuala last 16 kan khel tur hi kan tan a ṭha zawk em, ka hrethiam lo a, mahse, he hmuna khelh hi kan duh ber a ni.

"Pahnihna ni ringawt ila, last 16-ah team ṭha tak kan la tum thei tho alawm! Group hmahruaitu ni chunga last 16 luh hi player-ten inrintawkna an neih nan a ṭangkai a, kan fan-ten Wembley-a kan inkhel an en thei tur hi a ṭha a ni," a ti.

Southgate chuan huphurh bik an neih loh thu sawi bawkin, "Champion kan tum a nih chuan group F-a team-te ang hi hmachhawn an ngai tho tho a ni," a ti a, champion a tum ruh hle.