Scotland-in Modric-a ‘magic’ an ngam lo

Euro 2020 group stage aṭangin Scotland an tla a, an tlak ruala Scotland captain Andy Robertson-a thusawi chu, "Inkhel pumpui kha Modric-a'n a thunun a, goal ropui a khung bawk - chuvanga tlawm kan ni," tih hi a ni.

Robertson thusawi hi football khawvelin a ṭawmpui a, Scottish mipui tan pawh Modric-a 'magic' chu hmuhnawm ti lo chung chunga pawm a ngai a, a tawpa Scotland hnehtu chu Modric tih loh rual a ni lo.

Group D inkhelah Croatia chuan 3-1 in Scotland an hneh a, England ngam lotu Czech Republic tlanpelin pahnihna an ni a, point li nen Euro last 16 an lut.

The Scottish way
Scotland-a thu lar tak pakhat chu 'The Scottish Way' tih a ni a, chu ṭawngkam awmzia chu harsatna tam tak tawh hnua huaisen taka thawhlehna a ni.

Euro 2020-ah pawh Scotland-in an hneh theih ber tura ngaih Czech chu an match hmasa berah an ngam lo a, match hnihnaah inkhel hmuhnawm pho chhuakin England chu goal khung loin an chelh.

England laka an khelh ṭhat nan Billy Gilmour a ṭangkai a, mahse, he player hian Covid-19 a kai zui a, Croatia lakah an chhawr thei lo. Mahse, chu chu 'Scottish way' an tih chu a ni a, Croatia lakah chak an beisei.

A thlawn mai maw!
Glasgow khawpuia Hampden Park-ah Scotland ṭan tumin mipui sing tel an pungkhawm a, a vawi khat nana major tournament-a an ram inpetkai lai hmuh an tum a, an tu leh fate thlenga an hrilh chhawn tur thawnthu chu tem ve ngei an tum.

Mahse, beiseina leh suangtuahna chu a thlum ṭhin a, a tak ram erawh thawnthu danglam a lo ni leh ṭhin - minute 17-na lekah Nikola Vlasic-a'n Croatia tan goal hmahruai a khung a, Hampden Park chu reh tak a ni.

Scotland an lo la beidawng hauh lo - chawlhlawk hman a nih hmain Callum McGregor a inlar a, Scotland tan ṭha zetin an si phurh a rawn sut. Mipui 12,000 thawm chu maw 'a ring' tih hian a sawi fiah zo lo.

Mahse, magic a thleng a...
Scotland mipuiin Croatia lehthal beiseina an nei a, mahse, an hmachhawn team hian an neih ve loh neih an nei a, a hming chu Luka Modric a ni.

Real Madrid midfielder hi an match hmasa pahnih aṭanga teh chuan a chuai ve taah a ngaih theih a, Scotland laka a khelh danin thawnthu dang min hrilh thung - minute 62-naah mawi zetin Croatia hmahruaina goal a khung a, 2-1 a ni.

Modric-a goal a mawi a, chutihrual chuan ani ang player ṭha, hmun awl leh hun an pek danah Scotland player-ten an tih tur an ti tawk lo. Modric-a'n a la duhtawk lo cheu - corner aṭangin ṭha takin ball a thlawh phei a, Ivan Perisic-a'n mawi takin a tauh lut a, Croatia an tlang.

Sawi nawn a ṭul!
Croatia hi World Cup finalist angin teh an la ni miau a, an laka beiseina a sang hi a awm lo hran lo - mahse, Mario Mandzukic, Danijel Subasic leh Ivan Rakitic te an chawl vek tawh a, anni pathum thlak zo hi Croatia-in an la nei rih lo niin a lang.

Mahse, mamawh hunah tak heng player pathumte aia upa zawk Modric a inlar a, Scotland lakah vawi 115 zet ball tawk fuhin, vawi 98 zet pass a nei a, heng a pass zinga hmun thuma ṭhena hmun hnih deuhthaw chu Scotland goal hnaih lamah a ni!

Ram tana match 141 inlana Croatia tana inlan hnem ber record chelhtu Modric hian Croatia tana Euro-a goal khungtu upa ber record (kum 35 leh ni 286) a siam thar a, Euro 2008-ah khan kum 22 leh ni 73 mi niin Austria lakah goal a khung a, Euro-a Croatia tana goal khung thei naupang ber record a lo chelh tawh.