A zawnin Phoenix Suns an chak
Phoenix Suns chu Western Conference champion ni turin an dinhmun a ṭha ta hle. Suns hian conference finals khelh laiah game hmasa pahnih an la, nimin zing khan Los Angeles Clippers lakah 104-103 in hnehna an chang.
Best of seven series khelh turah Phoenix Suns hian 2-0 in hma an hruai. June 25, Zirtawpni zing dar 6:30-ah game 3 an khel leh ang; Clippers tan chetsual a hun tawh lo ang - a chak zawk hian NBA Finals an la khel zui leh dawn a ni.
A tawpah Ayton
Talking Stick Resort Arena-a inkhelah team pahnih an inhnehtawk hle a, kal fal thei pawh an awm lo. Chawlhlawk laiin Suns lamin point khat lekin hma an hruai a, inlehthal thei reng an la ni tih a chiang.
Hun tawp dawn thlenga an inhnehtawk em avangin over time (OT) an khel ngei dawn niin a lang hman. Mahse, hun tawp hma deuhin Deandre Ayton chuan mawi taka 'dunk' hmangin basket a rawn nei a, an chak tlangpui.
Hun tawp hma second 3.3 lek awm tawhah Mikal Bridges-a'n hmahruai belhchhahna a nih beiseiin 3-points a vawm a, mahse a hlah. Cameron Payne (29 points) leh Paul George (26) te an chet ṭhat bawk avangin hnehna chan phu zawk an chak.
Chak lo mah se Clippers hi an la beidawng lo ang tih a rin theih. Tun season playoff bikah pawh match hmasa pahniha an tlawm hnuin Dallas Mavericks leh Utah Jazz te an lehthal thei, tunah pawh thawh chhuah leh ngei an tum dawn.
A la tawp lo
Suns coach Monty Williams chuan, "Inkhel pawimawh em em a ni a, a ṭha thei ang bera ka naute rem khawm kha ka hna a ni. A tir aṭang khan hnehna chan tumin theihtawp kan chhuah, a tawpa vannei zawk nih pawh hi kan phu.
"Tun season zet chu a harsa, team tin kan inel a ni satliah loh a, hliam vanga buaina chu awm ve bawk mah se hri leng kan beih tel avangin thil a awlsam lo a ni," tiin a sawi. Suns player pawimawh Chris Paul chu an mach hmasa zawkah an chhawr thei lo a ni.
US media ṭhenkhat tarlan dan chuan Paul hian hri leng vanga inkaihhruaina dan a la zawm famkim lo niin an sawi a, hri leng hi kai chiah lo mah se invenna (vaccine) a lak dan chungchang chuan sawi zui a hlawh.
Williams chuan, "Chris chungchangah zawhna tam tak a awm, kei chuan player inkhel thei chin ka hmang mai," tiin a player chu chhawr theih a nih thu a sawi a, hetih lai hian media ṭhenkhat chuan training pawh a hrana nei lai a nih avangin inkhel tur a la nih loh thu an sawi ve thung.
Western Conference Finals
Game 1
Phoenix Suns 120 - 114 Los Angeles Clippers
Game 2
Phoenix Suns 104 - 103 Los Angeles Clippers
June 25, Zirtawpni
Game 3
Los Angeles Clippers 06:30 AM Phoenix Suns
June 27, Pathianni
Game 4
Los Angeles Clippers 06:30 AM Phoenix Suns
(Suns lamin series-ah 2-0 in hma an hruai)