Inter-ah Calhanoglu a lut

Inter Milan chuan an elpui AC Milan aṭangin Hakan Calhanoglu an lakluh thu an puang. Turkey international hian season thum daih contract a ziak a, kum 2024 June 30 thleng daih inremna an ziak tihna a ni.

Kum 27 mi Calhanoglu hian season hmasa khan Milan tan Serie A match 33 a khel a, a club hi pahnihna nih puiin season sarih hnua a vawi khat nan Champions League khel turin a tlinpui hial.

Bayer Leverkusen player hlui hian season liamta khan league bikah goal li khungin a ṭhiante khung tur vawi 10 ngawt a siamsak thei a, Italian football lama tawnhriat nei ṭha a nih tawh avang-in Inter tan a ṭangkai dawn.

Thu chhuah siamin Inter chuan, "Hakan Calhanoglu chu Inter Milan player a ni ta, kum thum chhung atan inremna kan nei," an ti a, an player thar hlawh zat tur erawh chiang taka ziah lan a ni lem lo.

Milan hian Calhano-glu bakah an goal keeper Gianluigi Donnarumma pawh an chan ngei dawn niin a lang. Italy inter-national hian a contract hmang zoin Ligue 1 club lian Paris Saint-Germain a zawm ang.