Hri leng hian Olympic hlutna a lantir dawn - Tokyo 2020 chief

Hripui vanga buaina karah Tokyo Olympic 2020 chu neih tlang tura kalpui zel a ni a, harsatna leh buaina hrang hrangin tibuai reng mah se Tokyo 2020 chief Seiko Hashimoto chuan kuminah hian Olympic hlutna tak an hmuh a beisei thu a sawi.

Japan khawpuiah hian infiammi ṭhenkhat chu an zin lut tawh a, inkaihhruaina hrang hrang zawm tur an nei dawn. Infiamna khawmpui lian hi ram pawn lam mi tan a hmuna en theih a ni dawn lo, tualchhung mi erawh stadium pakhatah mi 10,000 an punkhawm an phal dawn.

Beiseina chu
A tira ruahman dan chuan Tokyo Olympic hi nikuma neih tur kha a ni. Mahse coronavirus vangin khawvel a buai a, kum khatin an sawn tlai. Kuminah hian hri leng la awm tho mah se International Olympic Committee (IOC) chuan sawn nawn a remti lo.

Japan sorkar pawhin ruahmanna a kalpui ngar ngar a, zirchianna aṭanga a lan danin mipui tam zawkin thlen loh emaw, a hun sawn leh emaw duh mah se July thlatawp hian an nei dawn a, ruahmanna pawh an peih kim thawkhat tawh.

Tokyo 2020 chief Seiko Hashimoto chuan, "Tun hma chuan infiammi ni chungin Olympic ka lo hmachhawn tawh a, a nawmzia leh hlimawmzia pawh ka hre chiang hle. Kuminah erawh a boruak a danglam dawn chiang.

"Player leh fans an inpawh thei dawn lo a, thil nuam leh hlimawm tak tak kan tawn ṭhin ang kha an thei ve dawn lo. Mahse, hun harsa kara kan neih dawn avangin Olympic hlutna tak chu a lang chhuak ang," tiin a sawi.

A khirh dawn
Infiammi zin lut zawng zawngte chu an awmna tur hmun bikah bak an kal sawn thei dawn lo a, inelna an hmachhawn lai leh an zawh hnuah pawh zalen taka an tei vel phal a ni dawn chuang lo.

Zu in an phal dawn lo, in kuah, hlim vanga sahawk leh hming inziahsak te pawh phal a ni dawn lo. Infiammi ṭhenkhat chuan kalphung hi a khirh lutuk tiin sawisel mah se Japan erawhin tih danglam tumna a nei lem lo a ni.

Hashimoto chuan, "Europe lama infiamna an neihah chuan mipui an pungkhawm a, hlim takin an lawm thei tawh. Mahse keini lam chuan khatiang kha kan la thei ve dawn lo. Mipui lamin a lawmna boruak kan nei thei lo tur hi a harsa lai chu a ni ang," tiin a sawi.

Stadium chhunga infiamna entuten hmaituamna (mask) an vuah ngei tur a ni a, an ṭan zawngte an chetṭhat avanga lo au bengchheng pawh an remti dawn lo. Inelna buatsaihtute chuan Tokyo Olympic atan bik chuan thinlunga lawmna chu a pawimawh ber a nih thu an sawi bawk.