Chelsea, Arsenal leh Tottenham inkhel dawn

Premier League season thar inbuatsaih nan Chelsea, Arsenal leh Tottenham Hotspur te an inkhel dawn a, an inkhelna aṭanga an sum hmuh hi rilru lama harsatna neite tan hman a ni ang.

Arsenal hian August 1-ah Champions League nomawi kawltu Chelsea an mikhual ang, chumi hnuah Tottenham chu Blues hmachhawn turin Stamford Bridge-ah an lenglut thung dawn a ni.

North London derby chu August 8-ah an khel zui dawn a, season inbuatsaihna boruak hi a ngaihnawm dawn; London club-te hian player inenchhin nan an hman a rinawm a, chutih rualin an elpui club laka tlawm duh lo vek an nih avangin a hmuhnawm ang.

Chelsea manager Thomas Tuchel chuan, "Blues ka enkawl hmasak ber season-ah tawnhriat tam tak ka nei nghal. A bik takin elpui hautak takte khan tawnhriat ṭha min siamsak. Arsenal leh Tottenham te nena London derby boruak neih te kha a nuam ka ti," tiin a sawi.