Euro 2020 coaching staff-ah player langsar ṭhin an awm
UEFA European Championship 2020-a team enkawltu ni pha chin zawng hi chuan inkhelh hma leh inkhelh banah press conference an nei a, hriat an hlawh.
Ram 24 enkawltute hi a nawlpuiin an langsar a, team enkawl tur hian head coach bakah technical director leh coaching staff-te an awm. Chung zingah chuan an inkhelh hun laia langsar tak tak an awm a, tun ṭumah hian chung ho chu kan han thur chhuak dawn a ni.
Ebbe Sand Forward Coach
1998 World Cup-a Denmark forward chhuanvawr Ebbe Sand kha tun ṭumah hian Denmark forward coach a ni. Sand hi July 19, 1972 khan Hadsund-ah a piang a, Technical University of Denmark-a building engineering zir turin Copenhagen-ah a kal.
Thiamna lama building engineer ni ngat Sand hian goal khung pawh a thiam a, Denmark club ṭha Brondby IF tana a khelh hnuin Bundesliga club Schalke 04-ah a hun tawp a hmang. Denmark tan Sand hian match 66 a khel a, goal 22 a khung. 1998 leh 2002 FIFA World Cup bakah 2000 leh 2004 Euro-ah Denmark tan a khel vek a, 1998 World Cup-ah bench aṭanga lutin second 16 hnuaah goal a khung. Tun thlengin World Cup-a substitute goal khung rang ber a ni.
Ruud van Nistelrooy Assistant Manager
Dutch striker goal khung thei bik Ruud van Nistelrooy hi Euro 2020-ah Netherlands assistant manager a ni a, PSV Eindhoven Under 19 coach a ni mek bawk.
Van Nistelrooy hi July 1, 1976 khan a piang a, club tenau Den Bosch-ah bul ṭanin Heerenveen-ah hming a chher. Khawvelin an hriat ṭanna chu PSV a ni a, heta a khelh lai hian khawvel manager ṭha ber zinga mi Sir Alex Ferguson-a'n Manchester United tan a lalut.
Nisterlrooy hian PSV-a a khelh laiin Eredivisie nomawi a chawi a, Manchester United-ah Premier League chawi lehin Real Madrid tan La Liga nomawi a chawi leh bawk. Netherlands tan Nistelrooy hian match 70 a khel a, goal 35 a khung. Kum 44 mi Nistelroory hian pro license a nei tawh a ni.
Marcel Desailly Squad Leader, France
France-in 1998 World Cup an champion ṭuma player pawimawh Marcel Desailly hi Les Bleus coaching staff-ah October 6, 2011 aṭang khan a tel tawh.
Desailly hi a chak avang te, a nghet ṭhat avang te leh a rintlak avang tein 'The Rock' tiin hminglem an pe hial. Stade de France-a final khelh a nih ṭum khan minute 68-naah hnawhchhuah a ni a, amaherawhchu Zinedine Zidane-a goal hnih hmanga 2-0 a hma an hruai tawh avangin France an talbuai lo - a tawpah 3-0 in an chak.
Accra, Ghana-a piang Desailly hian Nantes club-ah bul ṭanin Marseille, Milan, Chelsea, Al-Gharafa leh Qatar SC tan a khel zui. Club inelnaah hian Champions League, Serie A leh FA Cup ah te nomawi a chawi. Ram inelnaah World Cup leh European Championship bakah Confederation Cup vawi hnih ngawt a chawi. Tuna France manager Didier Deschamps-a'n inkhelh a chawlhsan khan Les Bleus captain a ni a, khawvel footballer zinga sulhnu nei ṭha ber zinga mi a ni.
Thierry Henry Assistant Manager, Belgium
Thierry Henry hi tu nge a nih sawi nawn a ngai tawh lo a, khawvel striker ropui ber zinga mi a ni. Thierry Daniel Henry hi Belgium assistant manager a ni a, Euro 2020-a goal thum khung tawh Romelu Lukaku pawhin Arsenal legend hnen aṭang hian thil tam tak a zir tawh ang.
Henry hi August 17, 1977 khan Les Ulis, France-ah piang a; Monaco leh Juventus tana a hun hmasa lam a hman hnuin Arsene Wenger-a'n Arsenal-ah lalutin London club-ah a theihna tak tak a pho chhuak. Kum 43 mi Henry hi Premier League Hall of Fame-ah Alan Shearer nen lakluh nghal an ni a, hei hian tu nge a nih a sawifiah. Henry hian nomawi lian tham chu a chawi vek a, France tan match 123-ah goal 51 khungin Les Bleus tana goal khung tam ber a ni.
Henry hian Belgium assistant coach hna hi 2016-2018 chhung khan a thawk tawh a, Monaco leh Montreal Impact te enkawlin kumin May 30 aṭang khan Roberto Martinez hi a pui leh a ni.
Gianluca Vialli Team coordinator, Italy
Gianluca Vialli hian football khawvelah sulhnu ṭha tak a nei a, club langsar Sampdoria, Juventus leh Chelsea tan khelin nomawi lian tham a chawipui vek. Vialli hi Italy-a khaw pakhat Cremona-ah July 9, 1964 khan a piang a, khawvelin an ngaihsan chhan ber pakhat chu millionaire fapa ni chunga footballer ṭha a ni thei hi a ni. Cremona-a an chenna inah hian room 60 ngawt a awm a, nuamsa taka awm thei ni siin a tui ber football-a hlawhtling turin hrehawm tam tak a patlang.
Kum 56 mi Vialli hi a khaw club Cremonese-ah bul a ṭan a, Serie C aṭangin Serie B a kaipui. Club lian zawk Sampdoria-ah kum 1984 khan kalin a naupan laia a ṭhianpa leh tuna Italy manager Roberto Mancini nen hian a inkawp. Goal an khung theih avangin 'The Goal Twins' an ti hial.
Italy-in 1990 World Cup an thlen ṭum pawh khan Vialli hi a tel a, semifinal-ah Argentina lakah vanduaiin pathumna inchuhnaah England an hneh. Hemi ṭum hian Mancini pawh squad-ah tel ve mah se khelmualah a inlan lo. Vialli hian Sampdoria hnuah kum 1992 khan Juventus-ah kalin Serie A, Copa Italia, Supercoppa Italiana, Champions League leh UEFA Cup-ah a champion vek. Kum 1996-ah Vialli hian Chelsea a zawm leh a, English club hi FA Cup, League Cup leh UEFA Cup Winners' Cup-ah te a champion pui.
Coaching lamah pawh Vialli hian sulhnu a nei a, Chelsea leh Watford enkawl tawhin UEFA Pro Licence a nei a. November 11, 2019 khan Italy coaching staff hi a zawm a ni.
Daniele De Rossi Technical Coach, Italy
Italy captain hlui leh Roma legend Daniele De Rossi hi football khawvelah chuan player langsar a ni pha a, Rome khawpuiah an ngaisang zual. Kum 37 mi De Rossi hian kumin March 21 khan technical coach ni turin Italy national team hi a zawm a, Euro 2020 atan bika lakluh niin July 11, 2021-ah a contract a tawp dawn.
De Rossi hi Rome-a piang a ni a, AS Roma aṭangin a inzir chhuak a, an khaw club-ah hian hun tam zawk a hmang. Roma-a player langsar bera ngaih ṭhin chu club captain Francesco Totti a ni a, mipui lam chuan De Rossi hi 'capitan futuro' tiin hminglem an pe a, captain la ni tur tihna a ni.
Rinlawk ang ngeiin De Rossi hi Totti chawlh hnuah captain a ni a, sulhnu pawh a nei ṭha. Coppa Italia-ah ṭum hnih Roma hi a champion pui a, Argentine club Boca Junior-ah a hun tawp hmangin Primera Division-ah a champion pui.
De Rossi chanchina ropui ber zawk chu 2006 FIFA World Cup champion team-ah a tel a, hrem vanga a inlan tam lo chungin final-ah bench aṭangin a rawn lut a, penalty shootout-a goal khungtu zingah a tel. Roma legend De Rossi hi 2006 khan Serie A Young Footballer of the Year-ah thlan a ni a, 2009-ah Serie A Italian Footballer of the Year-ah thlan a ni leh bawk. De Rossi hian Azzuri tan match 117 a khel pha a, amah aia khel tam chu Paolo Maldini (126), Fabio Cannavaro (136) leh Gianluigi Buffon (176) te chauh an awm.
Ivica Olic Assistant Manager, Croatia
Bayern Munich forward hlui Ivica Olic pawh kum 41 mi a ni tawh a, tun ṭumah hian Croatia assistant manager a ni.
Olic hi September 14, 1979 kha a piang a, khawtual club Marsonia-ah bul a ṭan. Olic hian Dinamo Zagbreb, CSKA Moscow, Hamburger, Bayern Munich leh Wolfsburg tan a khel tawh a, kum 2017 khan football khelh a chawlhsan.
Football khelh a chawlhsan hian Croatia assistant manager hna hi a thawk ṭan nghal a, FIFA World Cup 2018-ah khan team enkawltu zingah tel tawhin, season hmasa khan CSKA Moscow-a enkawl zawk bawk.
Vedran Corluka Assistant Manager, Croatia
Croatia coaching staff-ah hian Manchester City leh Tottenham Hotspur defender hlui Vedran Corluka a tel. Kum 35 mi Corluka hian Croatia tan match 103 zet a khel a, goal li a khung a, 2018 FIFA World Cup-a pathumna a nih khan a tel.
Corluka hi February 5, 1986 khan a piang a, Dinamo Zagreb aṭanga bul ṭanin Man City, Spurs leh Bayer Leverskusen tana a khelh hnuin Lokomotiv Moscow-ah a hun tawp a hmang. Season liam ta khan Corluka hian Lokomotiv tan a la khel a, league match 22-ah la inlanin season tawp rualin football khelh a chawlhsan a, May 18 khan Croatia coaching staff hi a zawm.
Andreas Kopke Goalkeeping coach, Germany
Germany-in goalkeeper an nei ṭha ṭhin a, tuna an goalkeeping coach Andreas Kopke pawh hi a hunlaia goalkeeper ṭha ber zinga mi a ni. March 12, 1962-a piang Kopke hian Holstein Kiel-ah bul ṭanin 1. FC Nurnberg, Eintracht Frankfurt leh Marseille tan a khel tawh. Germany-in 1990 World Cup an champion ṭum leh 1992 Euro finalist team-ah khan a tel a, Bodo Illgner thachhang dawltu a ni.
Euro 1996-a Germany an champion ṭum khan Kopke hi player pawimawh a ni a, semifinal-a England an hneh ṭumin tun ṭuma manager Gareth Southgate-a penalty pet hi a dansak a ni.
Oliver Bierhoff Technical director, Germany
Germany technical director Oliver Bierhoff hi coaching staff-ah chuan tel chiah lo mah se European Championship a nih tawh chuan a hming lam hmaih a thiang lo. Euro 96 final-ah Germany chu mak takin Czech Republic lakah an hnufual a, manager Berti Vogts-a'n Mehmet Scholl la chhuakin minute 69-naah Bierhoff a dahlut.
Bierhoff hian minute 73-naah siphurh sutna goal a khung a, extra time-ah chakna goal a khung zui. Germany hi Bierhoff hoa Euro nomawi an chawi hnuah an la champion leh lo.
