Wembley Stadium-ah mipui 60,000

Euro 2020 khelhna mekna stadium zinga pakhat Wembley Stadium-ah entu awm thei zat tih pun a ni dawn a, semifinal leh final atan chuan a hmunah mipui 60,000 aia tam an punkhawm theih tur thu Britain sorkar chuan a puang.

England rama stadium hmingthangah hian mi 90,000 zet an leng a, tuna ruahman ang zat an lut a nih chuan stadium len dan aṭang chhutin 75% chuan an luah khat dawn tihna a ni a, tun hnai thla 15 chhunga UK-a mipui punkhawmna tam ber a ni ang.

Hripui leng vangin UK sorkar hian inkhuahkhirhna dan a kalpui mek a, mahse zawi zawia inthlahdul hret hret a ni; chutih rualin July 19 hma chuan inkhuahkhirhna hi tihtawp a ni dawn chuang lo.

UEFA president Aleksander Ceferin chuan, "Wembley Stadium chhungah Euro 2020 match hnuhnung lam pathum chu mipui tam zawkin an en thei dawn a, hei hi chanchin ṭha leh lawmawm tak chu a ni," tiin a sawi.

Wembley Stadium-ah hian group match pawh pathum khelh a ni a, heng inkhelah hian entu 22,500 bak an awm phal a ni lo. Ruahman dan chuan last 16 aṭangin entu 45,000 an awm thei dawn, hei hi ṭhutna awm zat aṭanga 50% a ni.

Tun hnai khan Italian prime minister Mario Draghi chuan a hmuna entu awm tam theih loh vangin final khelhna tur hmun sawn a lo rawt tawh a, mi tam takin a ngaihdan hi an ṭawmin a rinawm - stadium khata fans awma inkhel en an châk.

Mahse, UEFA chuan a hmun sawn tumna a awm loh thu an sawi a, chumi hnu lawkah UK sorkar lamin thuchhuah an siam zui tak avangin Euro 2020 semifinal leh final chu Wembley Stadium-ah an khel ngei dawn.

Ceferin chuan, "Tun tournament kan khelh hian beiseina thar min siamsak a, tun hma lama kan nunphung pangngai ang kha kan nei let leh mek a ni. UK sorkar lehPrime Minister chungah an thutlukna avang hian ka lawm takzet," a ti.

Wembley chhunga lut tur erawh an fimkhur dawn, inkhel en turte chuan Covid-19 an kai nge kai lo tih endikna an paltlang a ngai dawn a, hemi bakah hian inkhel an en hma ni 14-ah invenna (vaccine) chu a dose hnihin an la ngei tur a ni bawk.

UK Culture Secretary Oliver Dowden chuan ram mipui himna tur ngaihtuah chungin hma an lak thu a sawi a, World Health Organisation (WHO) erawhin Euro 2020 vanga mipui khuahkhirhna thlah zalen chu fimkhur a ngaih thu an sawi ve thung.

Tun thla ni 28 aṭangin tennis inelna Wimbledon an khel dawn a, July 11-ah an zo ang. Tennis inelna lian hi final bik chu a hmunah stadium khatin mipuiin an en dawn a, UK bikah chuan hripui len hnua stadium khata mipui an punkhawmna hmasa ber a ni ang.