Ronaldo Ropuia

Cristiano Ronaldo chuan World champion France lakah goal hnih khungin Iran legend Ali Daei-a siam ram tana goal thun ber record goal 109 a nihrual.

Nilaini zan inkhelah Portugal-in Ronaldo penalty goal pahnih hmangin France an chelh a, 2-2 in an inhnehtawk. European champion Selecao-in last 16 an lut a, nomawi humhim turin beiseina an nei zel.

Puskás Aréna, Budapest-ah stadium khatin mipui an pungkhawm a, player ṭha rual inkhel zingah player ṭha bik Ronaldo a langsar. Kum 36 mi Ronaldo hian minute 30-naah penalty aṭangin goal hmahruai a khung.

Real Madrid-a Ronaldo khelhpui ṭhin Karim Benzema-a'n France tan goal hnih a rawn khung a, first half-a injury time-ah penalty hmanga si phurh sutin minute 47-naah hmahruaina goal a khung.

Euro 2020 aṭangin Portugal tla thei dinhmunah an ding a, chhanchhuaktu an mamawh. Ronaldo bawk rawng langin minute 60-naah penalty aṭangin siphurh a sut.

Ronaldo hian Euro 2020 match tinah goal a la khung vek. Portugal captain hian Hungary 3-0 a an hneh ṭumin goal hnih a khung a, Germany 4-2 an hneh loh ṭumin goal a khung leh France nena goal khung nen tun inelnaah goal nga a khung tawh a, top scorer a ni mek.

Juventus forward hi Portuguese player zinga Euro group match pathuma goal vek thei hmasa ber a ni a, hei hi a record ropui tak tak zinga pakhat chauh a ni. Ronaldo hi Euro inelna pangaa inlan vek thei leh goal khung vek thei awm chhun a ni a, match 24 khelin goal 14 a khung tawh a, khelh tam leh goal khung tam lamah record a siam ve ve.

Qualifier chhiar telin Ronaldo hian match 59 a khel a, goal 45 khungin record a ni ve ve. Ram tana goal khung tam lamah Ali Daei record a nihrual a, a khum ngei dawn niin a lang.

Ronaldo hian goal 109 khung tur hian match 177 a mamawh. Penalty chhiar tel loin goal 95 a khung a, friendly match chhiar tel loin goal 90 a khung a, open play-a khung chauh pawh goal 85 a nih avangin a record hi sawi nep theih a ni lo.

Portugal captain Ronaldo chuan, "Tawp chin nei loa min thlawpna avangin team-te chungah lawmthu ka sawi e," tiin twitter-ah a ziak. Real Madrid leh Manchester United forward hlui hian ram tana match a khelh hnuhnung 45-ah goal 48 a khung!