Germany VANNEI Hungary VANDUAI

Germany chu hun rei zawk European Championship aṭanga tla thei dinhmuna an din hnuah minute 84-naah substitute Leon Goretzka-a'n goal pawimawh a khung a, Joachim Low hote an him hram.

Nilaini zan khan Allianz Arena-ah Germany-in Hungary an hmachhawn a, mikhual team hian captain Adam Szalai hmangin minute 11-naah hma an hruai nghal. Die Mannschaft an mangang a, minute 66-naah Kai Havertz hmangin siphurh mah se minute hnih hnuah Hungary-in Andras Schafer hmangin hma an hruai nawn.

Last 16 lut turin Germany-in point khat an mamawh a, Bayern Munich midfielder Goretzka-a'n minute ruk chauh a awm tawh tihin goal pawimawh a khung. Goal dang a luh belh tawh lo a, 2-2 a inkhel tawpin Low-a hote an him hram.

Germany-in Wembley Stadium-ah England an hmachhawn dawn a, inkhel en châkawm bik a ni ang.

Muller a hahdam
Joachim Low-a'n inkhel pawi-mawhah France leh Portugal an hmachhawn ṭuma mite hman nawn duh mah se inhliam vangin Thomas Muller a hahchawlhtir a ṭul. Muller aiah Bayern Munich tana a khelhpui Leroy Sane a luhtir.

Hungary-in France nen an inhnehtawk ṭuma inhliam vanga an lakchhuah captain Adam Szalai an chhawr thei a, kum 33 mi German club Mainz tana khel striker hian bul a ṭan.

A hming Szalai
Munich-ah ruah a sur nasa a, Portugal 4-2 a hnehtu Germany-in an khelh ṭhat an chhunzawm thei lo. Minute 11-na lekah counter attack hmangin Hungary-in an chhu let a, ding lam aṭanga Roland Sallai ball duhthusam chu Szalai-a'n a tauh goal. Hungary goal hi a class thlawt - Germany tlarhnung dem theih a ni lo.

Goal khat vang hian Germany hi tla thei an ni a, Hungary dinhmun a ṭha ta zawk. Mualneitu lamin na takin an nawr a, Joshua Kimmich-a corner pet chu Mats Hummels-a'n crossbar a tauh per. Matthias Ginter pawhin hnai tak aṭangin a pet goal lo a, keeper Peter Gulacsi zawnah tak a pet.

Ruahsur hnuaiah Germany an phur rei lo, Hungary an insiamrem a, mualneitu lamin chance ṭha an insiam thei lo. Hungary tlarhnung an chak ṭha a, awmze neiin an inrem avang leh an tam hneh hrim hrim vangin a phui ṭha hle.

Boruak a sang
Hungary tlarhnung a ngheh ṭhat avangin Low a mangang tih a lang a, second half ṭantirhah Muller pawh inti lum turin thu a pe. Germany-in Hungary tlarhnung an ṭhiat thei lo a, minute 58-naah Goretzka lut mah se Hungary forward Sallai-a'n freekick aṭangin goal ban a pet per zawk.

Minute 66-naah Germany an vannei a, Kimmich-a freekick keeper Gulacsi-a'n a hnek ṭhelh avangin Hummels-a'n goal lamah a tauh a, Havertz-a'n goal-ah chantir a, 1-1 a ni. Goal khungtu Havertz leh Gnabry aiah Muller leh Timo Werner te an lut a, Germany tan hna awlsam turah ngaih ni tawh mah se a la awlsam lo.

Hungary captain Szalai-a'n minute 68-naah ball ṭha pe lutin Schafer-a'n a tauh goal. Germany tla thei dinhmunah an ding lehnghal a, mikhual team-in tlarhnung remphui hna berah an ngei nghal bawk. Low-a'n risk lain rawlthar Musiala a luhtir.

Kum 18 mi Musiala hian inthlahrung miah loin box chhungah ball a khawih a, Bayern rawlthar hian Werner pe lehin German forward hian ball pet hi Hungary defender-in dang perin Goretzka-a'n ṭha zetin a pet goal. Germany tan Goretzka hi 'hero' a ni a, point hlawh chhuak turin an vannei tel bawk. Hetihlai hian Hungary erawh an khel ṭha thlawt a, an vanduai takzet.

Player inlante
Germany: Neuer; Ginter (Volland 82), Hummels, Rudiger; Kimmich, Gundogan (Goretzka 58), Kroos, Gosens (Musiala 82); Havertz (Werner 67), Gnabry (Muller 68), Sane
Hungary: Gulacsi; Nego, Botka, Orban, At. Szalai, Fiola (Nikolic 88); Kleinheisler (Lovrencsics 88), A Nagy, Schafer; Ad. Szalai (Varga 82), Sallai (Schan 75)

Rilru huaisen kan lantir. Tihsual kan nei a, mahse si phurh kan sut hma chu theihtawp kan chhuah. Team tenau anga ngaihten hloh tur an nei lo a, team dang pawhin harsatna an nei vek. A tawpa pawimawh ber erawh group stage paltlang a ni. - Joachim Low, Germany coach

Germany khan pressure chu min pe ngei a, mahse goal chance kan pe meuh lo. An siphurh an sut hnuah pawh ṭha takin kan khel zel. Inkhelh ṭan aṭang khan kan khingpuite lam ngaihtuah loin kan khelh dan turah kan chiang. Match pathumah kan khel ṭha vek a, kan tum tawk vek a, last 16 kan lut lo hi pawi kan ti kan takzet a ni. - Peter Gulacsi, Hungary goalkeeper