NBA Playoff : Young hoin Hawks an chak hmasa

Nimin zing khan NBA Eastern Conference Finals khelh ṭan niin Atlanta Hawks an chak. Game 1 inkhelah Hawks tan Trae Young-a'n point 48 zet neiin a team hi Milwaukee Bucks lakah 116-113 in hnehna a chanpui.

Team pahnih an inkhel tawk takzet, hun tawp dawn 29.8 seconds chauh awm tawhah Clint Capela hmangin Hawks lamin 112-111 in hma an hruai. Mahse, Young-a'n free throw aṭanga point li neih belhin a tawpa vannei zawk chu Hawks an ni.

Young-a'n point 48 bakah assist vawi 11 a nei a, Capela leh John Collins te pawhin point 10 chuang an nei bawk; Capela-a'n point 12 a neih bakah rebound vawi 19 zet a la - hnehna an chan theih nan a thawh hlawk hle.

Bucks erawh an vannei tawk lo, an khelmuala match nga chhung chak zawn thei ni mah se hun pawimawh laiah an zuih. Giannis Antetokounmpo (34 point leh 12 rebound) leh Jrue Holiday (33 point leh 10 assist) te hna thawh chu chakpui nan a tawk zo lo.

June 26, Inrinni zingah game 2 an khel chhunzawm leh dawn. NBA conference finals hi best of seven series hmanga chak zawk zawn a ni a, tlang tur chuan game li tal lak tlin a ngai.

Western Conference Finals lamah Phoenix Suns leh Los Angeles Clippers te an inhmachhawn bawk a, game hnih an khelh tawh chinah Suns an la chak ve ve. Conference champion pahnihin NBA title an inchuh zui leh ang.