Spurs hnartu Lopetegui

Jose Mourinho bantu Tottenham tan manager thar zawn hmuh leh chu thil harsa tak a ni. Tun hnaia an beisei hnaivai ber Sevilla manager Julen Lopetegui chuan North London club sawmna hi a hnawl.

Spurs hian April thla khan Mourinho an ban a, a hmun ruak luah tur zawngin hmuntin dap kual mah se an la hmu thei lo. Tunah chuan an striker hlui Jurgen Klinsmann nen thawm an nei mek, mahse thu chiang a la awm chuang lo.

Kum 54 mi Lopetegui hian La Liga-ah Sevilla hi palina ni puihin season tharah Champions League an khel dawn a, Real Madrid manager hlui hian Seville khawpuiah hna thawh chhunzawm a la duh.

Sevilla president Jose Castro chuan, "Julen chungah rinna kan nghat ngam a, a contract pawh kum hnih daih kan pawtsei reng a ni. Manager tam tak chu sum um vangin a rinawm lo ṭhin, ani erawh chutiang a ni lo hi a lawmawm," a ti.

Tottenham hian Antonio Conte, Paulo Fonseca leh an manager hlui Mauricio Pochettino te chu an beisei a, mahse an hlawhcham vek. Premier League season thar a hnaih tawh avangin manager zawn hmuh hma a pawimawh tawh ang.