Euro round of 16 - a 'hot' dawn : England vs Germany; Belgium vs Portugal

Football ngainatute nghahhlelh Euro 2020 pawh hripui leng karah kalpui zel a ni a, Nilaini zan khan group stage match pawh khelh zawh a ni ta.

Inelna hmachhawntu team 24 aṭangin team 16 chiah an tlang ta a, team pariatin inelna an mangṭha - last 16 match hmasa ber hi June 26 zan aṭangin khelh ṭan a ni dawn.

Wales vs Denmark ten zan dar 9:30-ah match hmasa ber an khel ang a, zan dar 12:30-ah Italy vs Austria ten an zui ve lehnghal ang a, football ngainatu tan mit a tlai leh dawn tih a chiang.

Rinin kan thlir...
Gareth Southgate-a'n champion tum tan team ṭha hneh a ṭul thu a sawi a, quarterfinal luh inchuhin Germany nen an intawng nghal dawn - June 29 zana team pahnih inkhel tur en châkin fans an awm hle hle thei tawh lo!

June 27 zanah Belgium leh Portugal inkhel tur pawh hi chil ti put tham a ni a, Romelu Lukaku leh Cristiano Ronaldo awmna team hi champion tura quality nei tawka inngai ve ve an ni a, a hmuhnawm dawn tih a chiang.

Croatia leh Spain ten June 28 zana a thiam pariat zinga tel an inchuh tur pawh hi en châkawm tih loh rual a ni lo a, Luis Enrique-a team hmuhnawmin player thiam bik Luka Modric leh a ṭhiante an hmachhawn tur hi football fans tan chuan a hlu dawn.

A chhehvel
Euro 2020 last 16 hi June 26 zanah khel ṭanin, June 29-ah khelh zawh a ni dawn a, tun thla ral hmain quarterfinal lut tur chu a chiang dawn tihna a ni.

England leh Germany inkhela chak zawkin quarterfinal-ah Sweden leh Ukraine inkhela chak zawk an tum dawn a, semifinal thlengin Netherlands, Czech Republic, Wales leh Denmark te chu tum theih tur an ni a, he team pahnih intawnga chak zawk tan final kalkawng a awlsam dawn niin a lang.

Belgium leh Portugal ah a tu zawk pawhin last 16 paltlang ta se, Italy vs Austria inkhela chak zawk an tum dawn a, semifinal-ah Croatia, Spain leh France-te tum theih dan a awm bawk.

Tling zo lo
Euro 2020 last 16-ah Turkey, Finland, Russia, North Macedonia, Scotland, Slovakia, Poland leh Hungary-te an inpetkai zo ve lo a, in lum aṭanga inelna en bak tih theih an nei ta bik lo.

Inelna ṭan dawna beisei san zinga mi Turkey chuan goal khat lek khung a, an lama goal riat lut chungin Euro an mangṭha a, point hlawhchhuah an nei lo - team pariat zingah North Macedonia nen chiah point hmuh nei loa tla an ni.

Finland, Russia leh Slovakia chu point thum hmu chunga last 16 lut zo lo an ni a, Ukraine leh Denmark ten point thum an hmuh chhawr ṭangkaiin last 16 an lut thung.

Pathumna ti ṭha
Euro 2020-ah group tina a sang pahnih chu last 16 lut chiang an ni a, group paruk aṭanga pathumna ti ṭha palite chuan an hnung an zui bawk.

Portugal, Czech Republic, Switzerland leh Ukraine te chu pathumna ti ṭha pali zinga mi an ni a, Ukraine tih loh zawngin point li an hmu vek - Ukraine hian point thum chiah hmu mah se goal difference avangin an tlang.

Finland (-2) leh Slovakia (-5) ten point thum neiin pathumna dinhmun luah ve tho mah se point thum nena pathumna ti ṭha pali zinga tel phak awmchhun Ukraine (-1) chu goal difference-ah an tluk lo a, Euro an mangṭha.

Top Scorer
Group Stage-ah team tinin match thum ṭheuh an khel a, goal khung hnem ber ni mek chu Cristiano Ronaldo a ni - Portuguese forward hian tun inelnaah goal nga a khung tling tawh.

Ronaldo hnuaiah goal thum khung player panga an awm a, Belgium striker Lukaku, Netherlands captain Georginio Wijnaldum, Sweden winger Emil Forsberg, Czech striker Patrik Schick leh Poland captain Robert Lewandowski ten goal thum ṭheuh an khung tawh.

Poland an tlak tawh avangin Lewandowski tan Ronaldo a um phak theih tawh loh a, player dang pali tan erawh top scorer nih beiseina a la awm - goal hnih khung tawh player 12 an la awm tih hriat a ṭha a, last 16 lut team aṭang vekin an ni.