TBL hnehtu Tuikual South beiseina a nung

Mizoram Super League season 6-ah team ṭha bik sawi theih a ni lo, league round aṭangin an in ngam tawn hle. Vawi hnih champion tawh Khatla TBL chu Tuikual South lakah 83-73 a an tlawm avangin semifinal lut turin an dinhmun a la chiang bik lo.

Thawhlehni zan Hawla Indoor Stadium, Republic Vengthlanga inkhelah Tuikual South lamin 2nd quarter an hman ṭhat an chhawr a, American player Darrel Bowie chu hnehna an chan theih nana tha thawhhlawk a ni.

Tuikual South coach C. Lalrohlua'n TBL hneh an tum tur thu Vanglaini a hrilh lawk a, an tum angin an khel. Phengphehlep tan tualchhung player an khel ṭha rual a, basket an neih a pawimawh tluk zetin basket an venghim 

ṭha chu an chakna hnar a ni.

American power forward Bowie-a'n point 32 a neih bakah rebound vawi 18 a la, rebound a lak zinga 18 hi anmahni basket hnaih ami a nih avangin a venhim kawngah a ṭangkai tel. TSBC coach Marova chaun, "A tlangnel telh telh," tiin a player chungchang a sawi. Inkhel boruak san laiin Bowie hian an basket bul hnaia TBL ball inpe kual lai chu chhuhsakin chak takin a tlanpui a, chiang zeta a 'Dunk' zui lai chuan fans thawm a ṭha hle. March 17, Thawhlehni zana Chanmari Vikings nen an inkhelh hunah basketball hmuhnawm a beisei leh ngam ang.

Zarkawt BCA laka an tlawm hnuah Khatla TBL an chak lo zui leh a, coach Lalrinzuala enkawl team hian an player enin theihna an nei tih chu a chiang. Amaherawhchu, season danga an inkhel hmuhnawm ang kha chu an la phawk chhuak phak rih lo.

TBL tan hian American player Xavier Dupree-a'n double-double (21 point, 15 rebound) nei mah se a team chak pui nan a tawk zo lo. Haryana tlangval Rakesh chuan court chhungah minute 14 chhung a inlan chungin point 10 bak a nei lo - danglamna siam turin an che ṭha tawk rih lo tihna a ni.

MSL season hmasa pahnih champion TBL hian an league match hnuhnung ber atan March 18, Nilaini hian Ramhlun BC an hmachhawn leh ang, knockout round la lut chiang lo mah se match an neih leh hma hian team dang result a zirin an tlang chiang thei bawk.

Mizoram Super League kai thar Ramhlun Sporting Club leh Chawnpui Basketball Club te zanin dar 6:30 hian an intawng dawn a, a chak lo zawk tan semifinal beisei ngam a har tawh ang.

Chawnpui hian match li an khelh tawhah chak ni hmel an la hmu lo a, tun ṭuma an khingpui tur hi an el tawk ber tura ngaih an ni. Ramhlun erawh Tuikual South lakah hnehna an chan tawh avangin zanina an chak leh a nih chuan semifinal an luh ngei a rinawm.

MSL6 Fixtures

March 12, Ningani

Chawnpui BC    06:30 PM    Ramhlun BC

March 13, Zirtawpni

Chanmari Vikings    06:30 PM    Zarkawt BCA

March 17, Thawhlehni

Chanmari Vikings    06:30 PM    Tuikual South

March 18, Nilaini

Ramhlun BC    06:30 PM    Khatla TBL

Thlirna Tawi

MSL6 Game 11

Tuikual South 83 - 73 Khatla TBL

QTR    1    2    3    4    TOT

TKS    11    30    15    27    83

TBL    15    10    22    26    73

TKS 

#    Player    Point    Rebound    Assist    Steal

1    Darrel Bowie    32    18    2    3

2    Lalnunpuia Renthlei    16    3    3    2

3    Eddie Zothanpuia    12    0    3    3

TBL

1    Xavier Dupree    21    15    1    0

2    Rakesh    10    8    1    0

3    Eddie Zaithanmawia    8    5    6    1

Team Dinhmun

#    Team    Pld    W    D    L    PD    Pts

1    Zarkawt BCA    4    4    0    0    71    8

2    Khatla TBL    4    2    0    2    4    6

3    Tuikual South    4    2    0    2    1    6

4    Chanmari Vikings    3    2    0    1    31    5

5    Ramhlun SC    3    1    0    2    -43    4

6    Chawnpui BC    4    0    0    4    -64    4