Portugal-in an huaisen rah an seng

Euro 2020 group stage match khelh tawp zanah football fan-te hmuh châk zawng zawng hmuh theih turin a in pho chhuak a, a bik takin group E inkhela thil thlen dan chu ngaihnawm leh hmuhnawm a tling takzet.

Portugal-in last 16 lut turin draw chiah mamawh mah se huaisen taka attacking football khel turin player an rem a, world champion France nen 2-2 in an inhnehtawk.

Cristiano Ronaldo chuan Portugal tan penalty aṭangin goal hnih a khung a, international football-a goal khung hnem ber Ali Daei record nih rualin ram tan goal 109 a khung tling ta bawk.

Karim Benzema-a'n France tana koh kir a nih hnuah goal a khung ve leh ta bawk a, Real Madrid striker hian ram tan a goal khung thiam a la theihnghilh lo tih pholangin goal hnih a khung.

Thutlukna huaisen
Portugal boss Fernando Santos-a'n huaisen takin thutlukna a siam a, world champion France hmachhawn dawn mah se a player rem dan aṭangin point thum a mitthla tih a lang.

Santos hian an match hmasa pahniha beisei phak lo Bruno Fernandes chu bench-ah a dah a, Hungary leh Germany laka fimkhur taka holding midfielder pahnih Danilo leh William Carvalho a dah chu bansanin Danilo chiah a luhtir.

Substitute bench aṭanga hmuhnawm taka khel ṭhin Renato Sanches-a'n bul a ṭan ve ta a, Joao Moutinho hmuh tur a awm bawk - tlarhmaah Ronaldo, Diogo Jota leh Bernardo Silva te an inkawp a, Portugal-in goal khung an tum tih a chiang.

France lamah inthlak danglamna hmuh tur a tam lo a, Corentin Tolisso leh Jules Kounde an lut tih loh chu hmel thar sawi tur an awm lo a, heti chung hian France chu rin hlawh zawk an la ni tho.

Thutlukna mak
Inkhel an ṭan a, France tan tlarhmaa Kylian Mbappe, Antoine Griezmann leh Karim Benzema inkawp chu hmuhnawm an tling nghal a, goal khung hmasa zawktu erawh Portugal an ni.

Inkhel ṭan aṭanga minute 30-naah France keeper Hugo Lloris-a'n ball hnekchhuah a tumna lamah Danilo a hnek fuh a, Portuguese midfielder hi na tih hmel takin khelmualah a tlu.

Referee tam takin penalty an pek lohna tur nia ngaihah referee-in penalty spot a kawk a, Ronaldo a lo pen chhuah miau avangin Portugal-in hma an hruai dawn tih a chiang.

Juventus forward hian rin lawk ang ngeiin harsatna nei loin goal-ah a chantir a, rin hlawh zawk France an hawihai - Ronaldo hi European player zinga major tournament-a goal khung hnem ber a ni a, goal 20 khungin Germany legend Miroslav Klose a khum.

Benzema a lo kir

France tan Benzema-a'n koh kir a nih hnuah goal a la khung lo a, Didier Deschamps-a lakah mi tam takin zawhna an neih phah - a tel lo pawha world champion an nih theih avangin Benzema an mamawh kher loa ngaitu an tam.

Mahse, first half hun pek belhah Benzema-a'n hun ṭha a nei a, France-in penalty an hlawh chhuak - Nelson Semedo chuan Kylian Mbappe tlan tur chu tharum hmangin a dang lui niin a lang a, referee-in penalty a pe.

Portugal penalty hmuh sawisel duh tan he penalty pawh hi sawisel theih a ni a, Portugal-in penalty hmuh an phu lo a nih chuan France-in hmuh an phu bik lo. Penalty pekna hi a nem hret niin a lang.

Mahse, inkhela thu ber referee-in penalty spot a kawk miau a, kum ruk dawn hnua France tana lo kir Benzema chuan a thiam a la theihnghilh lo tih pholangin goal-ah a chantir.

Ṭhian an hre lo!

Benzema goal khung hnu lawkah chawlhlawk hman a ni a, Real Madrid-a tlarhma hmuhnawm ber pawl min hmuhtir ṭhintu Ronaldo leh Benzema ten inkuah chungin dressing room lam an pan a, sawi tur tam tak an nei tih a hriat.

Mahse, second half ṭan a ni a, inṭhianṭhatna chu dah ṭhat nghal a ni a, minute hnihna lekah Benzema chuan goal a rawn khung - offside phar mah se ennawn a nih hnuah pawmsak a ni a, 2-1 a ni.

Portugal-in an dinhmun a him lo tih an hria a, theihtawp an chhuah zui. Minute 60-naah inkhela a vawi thum nan penalty a thleng leh a, Kounde handball vang a ni thung.

Ronaldo bawk a lo pen chhuak a, Portugal tana a match hnuhnung 45-a goal 48-a khungna ni turin a chhuih lut - hun tawp thlengin goal dang a lut lo a, Germany leh Hungary an inhnehtawk bawk avangin France-in hmahruaitu ni chungin last 16 an lut a, Portugal-in pathumna ti ṭha zinga tel chungin knockout round an lut ve bawk.

Champion quality

Team pahnih inkhel enin champion turin an ṭha tawk tih a lang a, an pahnih zinga pakhat zawk hian champion nomawi an chawi zui ta a nih pawhin mak tih tur a awm lo.

France tan Mbappe-a'n goal khung lo mah se a hmuhnawm ngaiin a hmuhnawm reng a, Portugal tlarhnung tan he player hi buaipui tham a tling takzet - Benzema hi 'world class' striker a la ni reng tih a lang bawk.

Paul Pogba a hmuhnawm ṭhin a, Benzema goal khung nana a ball pekte kha mit ti tlai an tling a, a pet goal ngei tur nia lang Portuguese keeper Rui Patricio-a'n save ropui hmanga a dansakte kha an sawi rei ve khawp ang - Griezmann theihna tak hmuhtirin kan la awm lo a, mahse, he player theihna sanzia hi chu kan hriat sa a ni.

Portugal-in Ronaldo an neih chhung chu manganna tur a awm lo a, kum 36 mi forward hi a chuai tawh anga sawi ni ṭhin mah se goal nga khunga Euro top scorer a nih mek avangin a chung berah a la awm tih a lang.