Poland tan Lewy goal hnih a tawk lo

Robert Lewandowski-a'n goal ropui pahnih khung mah se Euro last 16-a a team hruai thlen nan a tawk zo lo a, Sweden lakah 3-2 a an tlawm avangin an puanthuah telin Euro an mangṭha.

Round of 16 lut chiang tawh Sweden-in minute hnihna lekah goal an khung a, Emil Forsberg-a'n hmahruaina goal hi ṭha zetin a khung.

RB Leipzig winger hian a duhtawk mai lo - Juventus winger Dejan Kulusevski hnen aṭanga ball duhthusam a hmuh hnuah a duhnaah tak a pet a, Euro-a a goal thum khungna niin a team chu 2-0 in hma a hruaipui.

Poland-in last 16 lut turin chak ngei an mamawh a, 2-0 in an hnufual. Mahse, Lewandowski an neih miau avangin beiseina an nei a, an beidawng lo.

Bayern Munich striker hian minute 61-naah si phurh sutna goal mawi zetin a khung a, hun tawp nan minute ruk chauh a awm tawh tiha a khung pawh striker goal dik tak a ni.

Mahse, last 16 lut chiang Sweden-in group hmahruaitu nih a, last 16-a kawng awlsam zawk zawh an duh - hun pek belh minute linaah bench aṭanga luhtir Viktor Claesson chuan goal a khung leh a, 3-2 a chakin group hmahruaitu an ni a, last 16 an lut.

Poland-in January khan Jerzy Brzeczek banin Portuguese coach Paulo Sousa an lalut a, he thutlukna an siam chhan hi attacking football hmuhnawm zawk hmuh an duh vang a ni a, chu chuan an chhuanvawr Lewandowski a puih theih an ring bawk.

Poland captain Lewandowski-a'n Euro-ah goal thum khungin a team tan a theihna a pholang ngei a, mahse, Sweden lakah minute 17-na, 1-0 a nih laia a chance hlah kha khung ta ngat se, puanthuah tel loin last 16 khel turin an inpuahchah zawk mai thei.

Kum 32 mi striker hian cross aṭanga ball kal duhthusam chu bar a tauh per a, a per lehlam hi goal ruaka tauh luh mai awlsam tawh a ni - mahse, bar a tauh per nawn leh a, a tawpah an tuar.