Spain an inhrithla; goal an surtir!
Euro 2020-ah last 16-a hmun chang turin Spain-in an match tawp berah chak an mamawh a, goal nga nen an hmun an nemnghet - Slovakia chu 5-0 ngawtin an sawp!
Spain tan Alvaro Morata chuan penalty a khung loh hnuah Slovakia keeper Martin Dubravka-a'n an khingpui team hi goal a 'khilai' a, Spain an hawi kir tawh lo.
Aymeric Laporte, Pablo Sarabia leh Ferran Torres ten Spain tan goal khat ṭheuh an khung ve leh a, Spain-in goal khungpui mamawh lo viau mah se Slovakia midfielder Juraj Kucka chuan an lamah a ti lut ve leh a, 5-0 in Spain an chak.
Mamawh inang lo
Spain tan last 16 lut chiang turin chak a ngai a, Slovakia tan draw result a tawk thung - team pahnih tum a chiangsa. Spain-in chak an tum a, Slovakia-in an player rem dan hmangin draw an duhtawk tih a lang.
Minute kuana lekah Spain-in Koke hmangin penalty an hlawh chhuak a, Poland laka hlahtu Gerard Moreno aiah sawisel hlawh Alvaro Morata a lo pen chhuak - keeper tana dan nuam tawkin a pet a, a goal lo.
Mahse, Dubravka a hming ṭha rei lo - minute 30-naah Sarabia bar pet per, a per lehlam chu ben chhuah a tumna lamah an lamah a beng lut a, Spain tan goal a khungsak.
A surin a sur
Spain-in Sweden (85%) leh Poland (76.4%) lakah ball an chang hnem viau chungin goal khung an harsat a, vawi khat chiah goal an khung. Luis Enrique chuan a team chu uain bur khat tlat, la hawn loh ang mai an nih thu a sawi.
Dubravka-a'n Spain a fuih phur laklawh a, uain bur hawnin a awm - Laporte-a'n first half hun pek belhah Spain tana a goal hmasa ber hmangin a chhunzawm a, khel ṭha Sarabia chuan minute 56-naah a khung ve leh bawk.
Minute 67-naah Torres-a'n bench aṭanga a luh aṭanga second 22-na lekah a khung ve leh a, Spain international hlui Juan Carlos Valeron (39 seconds vs Russia, Euro 2004) hnua bench aṭanga lut player-in Euro-a goal an ran ber record a siam.
A tawp beiseina
Spain-in Torres hnuah pawh an la duhtawk lo - minute 17-naah Kucka chuan an lamah a ti lut ve leh a, hun tawp thlenga goal dang lut loin 5-0 in an chak.
Seville khawpuiah Spain fans an lawm a, an lawmna belhchhahtu chu Poland an ni - Polish team hian 2-0 a an hnufual hnuah Sweden lakah an si phurh an sut zo a, heti hian inkhel tawp se Spain hi group hmahruaitu an ni dawn.
Group hmahruaitu an nih chuan Croatia aiah Ukraine chu last 16-ah an tum thei dawn tihna a ni. Mahse, Sweden-in goal an khung leh a, Spain hi group hmahruaitu an ni zo ta lo.