Man City leh Arsenal inkhel tur ṭhulh

Coronavirus vangin nizana Manchester City leh Arsenal inkhel tur chu an ṭhulh. Thawhlehni khan Nottingham Forest leh Olympiakos neitu Evangelos Marinakis-a'n coronavirus a vei thu tihchian a ni a, Premier League-in City leh Gunners te match ṭhulh an nih thu an puang nghal.

February 28 khan Arsenal-in Europa League-ah Olympiakos an mikhual a, Greek club neitu hian Arsenal squad member leh staff ṭhnenkhat a hmuh avangin medical lam thiamte thurawn angin inkhel ṭhulh a ni. Premier League chuan Thawhlehni zan khan Premier League inkhel dang sawn tuma an neih loh thu thuchhuah an siam a, amaherawhchu coronavirus dinhmunin inkhelh hmabakah nghawng a nei dawn.

Marinakis hmutu chu Arsenal player leh staff  ṭhenkhat te hi ni 14 chhung dah hran an ni dawn. Gunners chuan, "Player ṭhenkhatin inkhelh banah Olympiakos an hmu a, dan angin ni 14 dah hran an ni dawn. Arsenal staff inkhelh laia Marinakis bula ṭhute pawh an inah ni 14 chhung an tawm ang," tiin thuchhuah an siam.

Football club lian pahnih neitu Evangelos Marinakis chungchangah Forest chuan, "Nottingham-a a cham laiin Marinakis hian covid-19 a vei tih hriat a ni lo a, Greece-a a let hnuah chauh hriat chhuah a ni. Club chuan mi thiamte rawn nghalin a ṭul angin hma pawh a la nghal," tiin thuchhuah an siam.

Marinakis hi Forest-in Zirtawpni zana Millwall 3-0 a an hneh loh ṭum pawhin City Ground-ah a awm a, English club chuan club hotu zinga Marinakis hmutu chu an dah hrang nghal. Chutihrualin Forest chuan an dah hran te hian covid-19 an vei tih hmuhchhuah a la nih loh thu leh invenna a nih thu an sawi.

Forest neitu hi Olympiakos neitu a nih avangin Premier League club Wolverhampton an hlauthawng nghal. Zanin dar 1:30 hian Wolves-in Olympiakos khelmual Karaiskakis Stadium an tlawh dawn a, English club hlauthawng hian UEFA hnenah inkhelh hun sawn dil mah se phalsak an ni lo.

Entu awm loin Europa League match hi khelh a ni dawn. Wolves hian ticket 1,000 an hralh hman a, club-in a man ngai ang thlapin an 'refund' ang.