Nomawi chawi lo tur Tottenham
Jose Mourinho-a'n 2003-04 season khan FC Porto tan ropui takin Champions League nomawi a chawi a, khatihlai hun khan RB Leipzig manager Julian Nagelsmann chu kum 16 mi chauh
a ni.
Mahse, 'Baby Mourinho' tia hminglem an pek coach hian 2020 a thlen meuh chuan amah nena an khaikhin coach ropui hi Champions League aṭangin a pet chhuak a, RB Leipzig chu a vawi khat nan Champions League quarterfinal a luhpui ta - German club tan mellung thar a phun.
Thawhlehni zan khan RB Leipzig hian Champions League round of 16 second leg-ah Spurs hi 3-0 in an lo hneh a, inkhel hmasa zawkah 1-0 a an lo hneh tawh bawk avangin inkhel pahnih belhkhawmah 4-0 in an chak.
Champions League last 16 inkhel dangah Atalanta chuan 4-3 in Valencia an hneh bawk a, inkhel hmasa nena belhkhawmin 8-4 in an tlang. Champions League an khelh hmasak berah quarterfinal an lut.
A goal hma
Spurs-in hliam vangin Harry Kane, Son Heung-min leh Moussa Sissoko an chhawr thei lo sa a, Germany an zin hma lawkin Steven Bergwijn inhliam thu an hriat zui bawk avangin beisei a sang lo. Minute 21 chhungin Marcel Sabitzer chuan goal hnih a rawn khung a, Emil Forsberg chuan goal khat a thawh ve bawk. Spurs-in a sutna tur an nei lo a, 3-0 in an tlawm.
Champions League aṭanga an tlak leh tak avangin Spurs hi 2007-08 season hnuah nomawi chawi loin an la awm chhunzawm zel a, Mourinho hi 2014 hnua Champions League knockout match-a hmachhawnah a la tlawm vek!
Spurs boss Mourinho chuan, "Beiseina chu kan nei ngei a, mahse a harsatzia kan hre lawk. Ball kangah an tlarhnung khan min lak khalh zel a, an goal nawr a na bawk si. Team ṭha zawk an ni a, tlang an phu a ni," a ti.
Ilicic a mawi
Valencia-in coronavirus vangin stadium-ah fans an luhtir thei lo a, entu nei lo chungin Atalanta an lo mikhual - Italian club hian first leg-ah 4-1 in hnehna an lo chang tawh a, Spain-ah pawh goal an khung hmasa.
Atalanta goal li hi Josip Ilicic a khung vek a ni a, minute thumnaah goal khung ṭanin a goal hmasa pahnih hi penalty aṭanga lut a ni. Valencia tan Kevin Gameiro chuan goal hnih a khung ve bawk a, Ferran Torres chuan goal khat a thawh zui - Valencia-in goal thum an khung hian 3-2 a ni leh hman a, beiseina tlem an nei hman.
Mahse, Ilicic-a'n goal hnih a khung leh tak avangin Valencia beiseina chhut chhiatin a awm. Slovenian striker Ilicic hi kum 32 leh ni 41 mi a ni a, Champions League khualmuala hattrick siam thei upa ber record a siam.
Champions League
Last 16 Results
First Leg
Atalanta 4 - 1 Valencia
ATA : Hans Hateboer 16', 62';
Josip Ilicic 42';
Remo Freuler 57'
VAL : Denis Cheryshev 66'
Tottenham 0 - 1 RB Leipzig
LEI : Timo Werner 58' (P)
Second Leg
Valencia 3 - 4 Atalanta
VAL: Kevin Gameiro 21', 51';
Ferran Torres 67'
ATA: Josip Ilicic 3', 43', 72', 82'
*Inkhel pahnih belhkhawmah 8-4 in Atalanta an chak
RB Leipzig 3 - 0 Tottenham Hotspur
RBL: Marcel Sabitzer 10', 21';
Emil Forsberg 87'
*Inkhel pahnih belhkhawmah 4-0 in Leipzig an chak