France tan chhuanlam siam a rem dawn lo

Hungary nen an inhnehtawk a, Portugal lakah an chak zo lo bawk - inkhel pahnihah hian France tan chhuanlam tur a awm. Tling chiang tawh an nih hnua inkhel leh stadium khat tlata fans puihna dawng team an hmachhawn vang a ni.

Les Bleus hian zanin dar 12:30 hian Euro 2020 quarterfinal khel turin National Arena, Bucharest-ah Switzerland an hmachhawn ang. Inhnehtawk a awm thei dawn tawh lo, world champion tan chhuanlam siam a rem tawh dawn lo.

Fimkhur a ngai
Group of Death hmahruaitu an ni thei a, hei ringawt pawh hi Swiss team tan France hmachhawn an châkawm lohna chhan a tling. Didier Deschamps-a nauten inkhel hautak pathum an hmachhawn tawh avangin card hmu pawh an tam.

Antoine Griezmann, Lucas Hernandez, Presnel Kimpembe, Benjamin Pavard leh Hugo Lloris te hi yellow card hmuh leh palh chuan hrem theih an ni tawh, chak mah se quarterfinal khel lo tura hrem theih an ni tihna a ni.

Swiss lamah pawh player pangain card an hmu tawh a, sapatal a thiang bik lo. Yellow card hmuh vanga match khat hrem theih zingah defender Fabian Schar leh midfielder pawimawh Granit Xhaka te pawh an tel.

Pogba awmna
France hi squad chhah bera chhal ngam an ni, chutih rualin danglamna siam thei erawh an ni vek bik lo. Midfield thunun turin Paul Pogba-a'n zalenna zau tak a neih leh a rinawm; Manchester United midfielder hian Portugal lakah through ball pe thiam bik a nihzia a lantir tawh.

Pogba ball pek dawng tur hian rawlthar tlan chak Kylian Mbappe leh goal khung thiam Karim Benzema te an nei. France tlarhma hi an ṭha tawk, inelna tir lamah Benzema-a'n beisei phak lo mah se a match hnuhnung berah erawh striker ṭha bik a nihna a lang.

Team ṭha ni mah se France hian zir belh tur an la nei. Hungary leh Portugal laka an khelh ang khan an tlarhnung a nghing a nih chuan champion a harsa dawn. Hernandez hi 100% a fit a ni hleithei lo, Lucas Digne a hliam bawk avangin Clement Lenglet a inlan a rinawm.

France defender Kimpembe chuan, "Tihsual a thiang tawh lo, a nih loh chuan tlak a nimai. Switzerland hian hna hautak min siamsak ngei dawn avangin kan theihna zawng zawnga kan khelh a ngai dawn," tiin a sawi.

A harsa dawn
Ram pahnih hi 1905-2003 khan vawi 32 an inkhel a, friendly match vek a ni. A hnu lamah competitive match vawi ruk khel tawhin Swiss hian chak ni hmel an la hmu ve lo, tun hma lama an la tih theih ngai loh tih thut hi a awlsam dawn lo.

World champion hneh an duh a nih chuan Switzerland tan tlarhnung rem phui chu an hna hmasa tur a ni. Defender Ricardo Rodriguez chuan, "Chak lo tura rin kan ni tih kan hria, mahse kan zam phah lo. Mahni inven a pawimawh a, chutih rualin goal khung kan tum dawn," a ti.

Euro 2020-ah mahni tawka khel ṭha tlang dawn ila Xherdan Shaqiri hming a ring ang. Swiss midfielder hian Euro 2016 last 16-ah khan goal mawi bik a lo khung tawh a, tun inelna neih laiah pawh Turkey an hneh ṭumin goal hnih a khung - ani hi ven ngai bik tur a ni ang.

Team pahnih khaikhin chuan Swiss hian chhuan tur an nei lo. Mahse, coach Vladimir Petkovic-a'n thawhhona ṭha chu an chakna hnar a nih thu a lo sawi tawh ṭhin a, tun ṭumah pawh hian inelna liana an la hneh ngai loh lakah team ṭanrualna chu an hmachhuan a ni dawn.

Inlan tura rinte
France: Lloris; Varane, Lenglet, Kimpembe; Pavard, Pogba, Kante, Griezmann, Rabiot; Mbappe, Benzema.
Switzerland: Sommer; Elvedi, Akanji, Rodriguez; Widmer, Freuler, Xhaka, Zuber; Shaqiri; Embolo, Seferovic.