Kolkata-in I League a thleng leh dawn

All India Football Federation (AIFF) hnuaia league hrang hrang kalphung tur ruahmantu League Committee chu Inrinni tlai khan online kaltlangin an ṭhukhawm a, season thar atana I League chu Kolkata khawpuia khelh turin an rel.

Covid-19 hri leng mek avangin I League hi entu awm loa kalpui leh tur a ni a, team-te chu hmun khatah awmin midang tlawh pawh loh turin an inkhunghrang ang - I League qualifier pawh Bengaluru-in a thleng dawn a, September 2021-a khelh tur a ni.

Qualifier khel tur hian state league nei leh I League qualifier khel tura qualifying championship huaihawt state-te chuan club pahnih an thawh thei dawn a, League Committee-in heta ṭang hian state pakhat aṭangin club pakhat zel an thlang leh ang - qualifier hi club 10 inelna tura ruahman a ni.

I League season hman zawh takah khan Sudeva Delhi FC chuan direct entry hmangin India rama football inelna ngaihhlut hlawh hi an khel a, tun season-ah hian Sreenidhi FC chuan sum hmangin hmun ruak pakhat an chang ve leh bawk - qualifier aṭanga tling team nen club 13-in tun season I League chu an hmachhawn dawn tihna a ni.

Covid-19 hri leng vangin AIFF chuan season hmasa I League-a relegation awm chu a lo tibo tawh a, Neroca FC-in I League an khelh chhunzawm dawn tihna a ni. Manipur club bakah hian champion lai Gokulam Kerala, Aizawl FC, Chennai City, Churchill Brothers, Indian Arrows, Mohammedan Sporting, Real Kashmir, Trau, Sreenidhi FC, Sudeva Delhi, Punjab FC leh qualifier aṭanga tlingte chuan I League hi an hmachhawn dawn.

League CEO Sunando Dhar chuan, "Season hmasa ang tho khan a kalphung chu a ni dawn a, vawi khat ṭheuh an inkhelh kual hnuah group pahnihah ṭhen hran an ni leh ang.

"A chung lam team pasarih chu group khatah awmin, champion inchuhin an inkhel kual leh ang a, team dang parukin division hniam lama tla tur an zawng leh dawn a ni," a ti a, club 13 an inel tawh dawn avangin match pawh season hmasaa 80 khelh aṭangin 114-ah a sang chho ang - tun season-ah hian relegation erawh kalpui ngei tawh tur a ni.

Sunando chuan, "December thla laihawl velah chuan league kan ṭan leh theih kan beisei a, season hmasa anga Kolkata khawpuia inelna nghah a nih leh theih nan Indian Football Association (Bengal) leh West Bengal sorkar nen pawh kan indawr mek a ni," a ti.

AIFF League Committee-ah hian deputy chairman leh MFA honorary secretary ni bawk Lalnghinglova Hmar chu a tel a ni.