Croatia vs Spain - Tu zawk nge tlang dawn?

Euro 2020 round of 16-a inhmachhawn tur hriat a nih ruala en châkawm zinga tel chu Croatia leh Spain te inkhel a ni a, team ṭha pahnih hi zanin dar 9:30-ah an intawng dawn ta.

Football khawvelah chuan ram pahnih hi an te thei lo - a bik takin Spanish media lam chuan he inkhel tur hi an nghakhlel a, an chanchinbu lar Diario AS chuan, "Phuba lak châka tuihal," tiin a ziak kuau a, Spain-in phuba lak an duh thu a tarlang.

Nations League 2018-ah khan Croatia hian 3-2 in Spain an hneh a, La Roja hian semifinal an luh loh phah. Spanish media-ten hei hi an la theihnghilh lo a, Croatia laka chek ngei turin an team an duh.

Chutihrual chuan Croatia hi Luka Modric awmna team an nih miau avangin awlsam taka hneh theih an ni lo ang tih hriat a ṭha a, zanin inkhel a hmuhnawm dawn.

Team pahnih
Spain-in an captain Sergio Busquets Covid-19 kai avangin an duh angin inbuatsaihna an nei ṭha tawk lo a, rin kai pawl ni chungin bul pawh an ṭan ṭha tawk lo - an match hmasa pahnihah Sweden (0-0) leh Poland (1-1) an inhnehtawkpui.

Mahse, match hnuhnung berah erawh anmahni inpal hnawksa thianfaiin Spain-in an theihna tak tak an pholang a, Slovakia chu 5-0 ngawtin an sawp - last 16 an lut chiang hle.

Croatia thawnthu a danglam tam lo - an match hmasa berah England (1-0) an ngam lo a, Czech Republic (1-1) an inhnehtawkpui zui. Mahse, match tawp bera Scotland an hmachhawn ṭumin Modric-a 'magic' hmuh turin a awm a, 3-1 a hnehna changin last 16 an inpetkai.

Croatia coach Zlatko Dalic-a'n Czech an hmachhawn hmaa a thusawi chu, "Kan chhe ta duai a ni lo a, insiamṭha leh tura kan mamawh chu vawi khat chak a ni mai," tih hi a ni a, team pahnihin an match tawp berah chak chungin an insiamṭha tih an lantir a, zaninah an incho tawk khawp ang.

Perisic tel lohna!
Croatia-in Spain an hmachhawn hmain chanchin lawmawm lo an nei a, an player pawimawh Ivan Perisic chuan Covid-19 a kai avangin Spain a hmachhawn ve thei dawn lo - player leh staff dang erawh an result a negative vek thung.

Inter Milan winger hmun ruak luah turin Ante Rebic, Josip Brekalo, Mislav Oršic leh Luka Ivanušec an awm a, Dalic-a'n tun inelnaa a chhawr ngun Rebic lam a hawi tura ngaih a ni.

Midfielder Mateo Kovacic chuan, "Ka khelh ṭhat chhan chu ka chunga rinna an nghah vang a ni," tiin a sawi a, Kovacic hi Dalic-a'n 4-3-3 formation a hmang leh a nih chuan Modric leh Marcelo Brozovic nen a inkawp tir leh ang tih a chiang a, anni aia midfield inkawp duhthlan tur an tam bik chuang lo.

Croatia-in goal li an khung tawha goal hnih chu Perisic-a khung a ni a, a awm dawn tak lohah chuan Rebic leh Bruno Petkovic-te goal an khung thei tih an lantir a ṭul a, Andrej Kramaric pawh a khel a nih chuan season hmasaa Hoffenheim tana goal 25 khungtu a ni tih a lantir a hun tawh.

Morata & 10
Spain boss Luis Enrique-a'n Euro-a a thusawi lar tak pakhat chu, "Álvaro Morata leh player 10-in inkhel bul an ṭan ang," tih hi a ni a, kum 28 mi striker hian zaninah pawh bul a ṭan leh ngei a rinawm.

Juventus striker hian tun hnaiah sawiselna a tawk nasa a, group stage match kha Spain-ah an khelh bawk avangin pressure a nei nasa nia sawi a ni. Spanish chanchinbu lar Marca chuan, "Copenhagen khawpuiah last 16 an khelh dawn avangin pressure nei loin a khel thei ang," an ti a, Morata 'tak tak' hmuh an beisei.

Sweden lakah Pablo Sarabia-a'n bul ṭan a phuzia goal hmangin a pholang a, zaninah Gerard Moreno nen Morata thlawp tura lut tura ngaih an ni - midfield-ah inthlak danglam loin Busquets, Pedri leh Koke an inthlawp a rinawm.

Tlarhnungah Sweden laka bul ṭan lo Pau Torres chu Eric Garcia nek chhuak tura ngaih a ni a, right back-ah midfielder Marcos Llorente chhawr luih ai chuan Cesar Azpilicueta khelhtir mai a finthlak zawk tih chu Sweden lakah Enrique-a'n a hmu tawh bawk.