Vawiin aṭangin Wimbledon an ṭan dawn
Tennis tournament upa leh ngaihhlut hlawh Wimbledon 2021 chu vawiin tlai aṭangin khelh ṭan a ni dawn a, mipa singles champion lai leh world number 1 ni bawk Novak Djokovic chuan zaninah tualchhung tlangval Jack Draper a hmachhawn nghal ang.
Season hmasa khan hripui leng vangin Wimbledon hi an khel thei lo. Kuminah erawh a hmuna entu awm chungin an khel leh tawh dawn a, mipa leh hmeichhe singles final phei chu Centre Court khatin entu a awm thei dawn a ni.
Grass court inelna lianah hian vawi riat champion tawh Roger Federer a inlan dawn a, Swiss star hian Thawhlehni zanah a match hmasa a khel ang. Rafael Nadal leh Dominic Thiem te erawh London khawpuiah hian a inlan ve dawn lo thung.
Novak a inpeih
Nadal hnehin French Open nomawi a chawi a, tunah chuan Djokovic tan thil huphurhawm tur dang a awm tawh chuang lo. All England Club-ah hian a title a humhim a nih chuan Grand Slam lak hnem lamah Roger Federer leh Nadal (20 titles) a nihrual thei dawn.
Serbian star Djokovic chuan, "Kuminah major title pahnih ka la tawh, a bik takin Roland Garros-ah ka khelh ṭhat avangin kum dang zawng aiin tunah hian inrintawkna ka ngah. Paris khawpuia inelna khan taksa bakah rilru thlengin chakna min pe," a ti.
World number 1 hian Wimbledon atan inbuatsaihna hun a ngah bik lo a, grass court-ah singles phei chu a khel lo. Mallorca Open-ah doubles a khel a, final thleng hial mah se a ṭanpui Gomez-Herrera a inhliam vangin an inlan lo.
Kum 34 mi Djokovic chuan, "Tunah chuan Wimbledon a ni ta, ka khingpui tur Jack hi Queen's Championship-a a inkhel ka en tawh a, a khingpui Jannik Sinner a hneh a nih kha. Sinner nen hian training kan neihnaah pawh a chanchin ka zawt," tiin a inzir chian thu a sawi.
Halep a tel lo
Wimbledon hmeichhe singles champion lai Simona Halep chu a chawn hliam vangin a inlan thei dawn lo. Romanian star hian inlan theih beiseiin hun tepter tak thleng nghak mah se a inhnukdawk ta zawk.
May thla a khelh Italian Open-ah Halep hi a inhliam a, a hliam vang hian French Open pawh kha a khel thei lo. Halep chuan, "Wimbledon atana ka inpeih theih nan theihtawp ka chhuah, mahse a tawk zo si lo," a ti.
Wimbledon 2019 final-ah khan Halep hian Serena Williams hnehin title a la, kuminah Serena hi a inlan leh dawn; Amercian star hian Grand Slam nomawi chawi hnem ber Margaret Court-i record (24 titles) nihrual a tum leh ang.
Hmeichhe player zingah fal taka kal an awm hleithei ta lo. World number 1 Ashleigh Barty leh tun hma lama lo hlawhtling tawh Garbine Muguruza ten enbik an hlawh dawn a, tleirawl duhawm Coco Gauff pawh thleng sang thei tura beisei zinga mi a ni.
Vawiin Inkhel Tur Langsar
Mipa Singles
John Millman 03:30 PM Roberto Bautista Agut
Federico Delbonis 04:45 PM Andrey Rublev
Novak Djokovic 06:00 PM Jack Draper
Stefanos Tsitsipas 06:45 PM Frances Tiafoe
Diego Schwartzman 06:45 PM Benoit Paire
Hmeichhe Singles
Wang Xinyu 04:45 PM Sofia Kenin
Monica Niculescu 05:30 PM Aryna Sabalenka
Iga Swiatek 08:45 PM Hsieh Su-wei
Note: Match hmasa ber hi tlai dar 3:30-ah an ṭan ang, inkhel rei dan a zirin match hnuhnung ṭan hun hi a danglam thei.