Bucks-in Hawks an nihrual

Giannis Antetokounmpo-a point 25 neih hmangin Milwaukee Bucks chuan Atlanta Hawks lakah 125-91 in hnehna an chang. NBA Eastern Conference finals series khelh laiah team pahnih hi 1-1 in an inhnehtawk mek.

Best-of-seven series a nih avangin NBA Finals lut tur chuan vawi li chak tlin a ngai. Tukin dar 6:00 hian game 3 an khel chhunzawm leh nghal ang. Western Conference finals lamah Phoenix Suns chuan Los Angeles Clippers lakah 2-1 in hma an hruai mek ve thung.

Bucks an chak
Game hmasa zawka an chak loh avangin Milwaukee Bucks tan chetsual nawn a pawi thei a, fimkhur takin game 2 an khel. NBA Most Valuable Player (MVP) vawi hnih ni tawh Antetokounmpo-a'n a hunah tak player hlu bik a nihna a lantir.

Greek tlangval bakah hian point 22 neitu Jrue Holiday-a'n a thawh hlawk a, quarter hnuhnung lamah Holiday hi hahchawl mah se a tha thawh hi an chak nan a pawimawh; quarter hnihna an khelh lai phei chuan Bucks hian a zawnin point 20 neia kaltluan lai an nei hial.

Hawks thiampuipa Trae Young-a'n pont 15 a nei a, match hmasa zawka point 48 a neih nen chuan a inthlau hle. John Collins (11 points), Cam Reddish (11) leh Danilo Gallinari (12) ten point 10 chuang nei mah se mimala cheṭha fal an awm lo.

A inṭan chauh
Game 2 bikah nuamsa takin an chak a, game 3 leh game 4 chu Atlanta lamah an khel dawn. Hawks coach Nate McMillan chuan, "Game khat kan la, hnehna kan chan avangin a lawmawm, ka naute an khelh ṭhat vek avangin a lawmawm zual.

"Inkhel thunun tak chunga hnehna chan hi chu duhthusam a ni a, amaherawhchu kan tawpna tur a ni lo. Tunah hian series-ah kan nihrual ve chiah a, inelna tak tak kan hmachhawn dawn tih kan hriat a ngai," a ti.

Regular season bikah Bucks hi cheṭha zawkin, playoff-ah seeded pathumna an ni. Seeded pangana Hawks hian an mual State Farm Arena an hman thiam avangin inkhelh a awlsam dawn lo, team pahnih hian gaem 7 thleng an khel a nih pawhin a mak lo ang.