England-in penalty pet an zir
Euro last 16-a Germany nena inkhel tur England defender John Stones chuan penalty pet an zir thu a sawi a, Die Mannschaft nen hun pangngaiah lo inhnehtawk pawh ni se tlawm an tum lo hle.
Three Lions hian European Championship knockout match an khelh tawhah minute 90 chhunga chak an la nei miah lo a, an chak pawhin extra time leh penalty hmanga chinfel a ni zel.
Kum 1996-a England-in Euro a thlen khan semifinal-ah Germany nen an inkhel a, he inkhelah hian tuna Three Lions coach ni mek Gareth Southgate chuan penalty pet goal loin England an tlawm.
John Stones chuan, "Tun dinhmunah chuan penalty kan zir nasa takzet a, mimal tinin penalty kan pet hun a lo thlena ngaihtuahna sawr bing dan thlengin kan zir vek a ni," a ti a, quarterfinal luh an tum.
World Cup 2018 last 16-ah khan England hian World Cup-a an penalty mangchhia chu thlahin Colombia chu penalty hmangin an lo hneh tawh a, major tournament-a penalty an hmachhawn vawi riata vawi hnih an chak vena chauh a ni.
Stones chuan, "Kha penalty-ah khan a pet tur pasarihna velah ka awm a, hlauhthawnawm duh tak a ni. Mahse, penalty pet tur khan kan inbuatsaih ṭha em a, penalty pet turin ka inpeih thlap.
"A nihna dik takah chuan Harry Kane emaw club tana penalty pet ngun tak emaw kan nih loh chuan hetiang hunah hi chuan a zamawm duh ṭhin," a ti a, inzir lawkna chuan nasa taka a puih tur thu a sawi.
England hian Euro group stage match thum an khelh aṭanga point sarih neiin last 16 an lut a, Germany nen hian Thawhlehni zan dar 9:30-ah an intawng dawn.
Stones chuan, "Vawi tam tak ka lo sawi tawh a, kei leh ka ṭhiante hian kan ramin he team leh English football an thlir dan hi thlak kan duh. Kum 2018 hnuah khan hmasawn zawngin kan kal ni pawhin ka hria a, chutianga hmasawn zel chu kan duh.
"Pressure kan insiam loh a ṭul. He ramin a la chawi ngai loh nomawi chu chawi turin kan hmaah a inchhawp a, chuvang chuan kan phur em em zawk tur a ni - hei leh chen kan lo hlawhchhuah tawh huaisenna nen kan hmachhawn a ngai a ni," a ti a, nomawi chawi ngei a tum ruh hle.