World number 1 Amit Panghal

Indian boxer ṭha mi Amit Panghal chuan world number 1 nichungin Olympic a hmachhawn dawn. International Olympic Committee (IOC) hnuaia Boxing Task Force (BTF) chuan Inrinni khan ranking an ti chhuak a, Amit Panghal hi flyweight (52kg) category ranking-ah pakhatnaah an dah.

Kum 25 mi Panghal hian Asian Games-ah kum 2018 khan gold medal a la tawh a; 2019 World Boxing Championships leh 2018 Commonwealth Games-ah silver medal la tawhin Asian Boxing Championships-ah gold (2019), silver (2021) leh bronze (2017) a la vek tawh a ni.

Kumin Olympic inelna hi Tokyo-ah July 24 - August 8 chhung hian khelh a ni dawn. Haryana tlangval Panghal tana chanchin lawmawm chu quarterfinal hmain boxer ṭha a hmachhawn a rinawm loh. Chutihrualin flyweight category-ah hian Uzbekistan boxer Shakhobidin Zoirov (World number 5), France boxer Billal Bennama (2), Algeria boxer Mohamed Flissi (3) leh China boxer Hu Jianguan (4) te an awm avangin medal lak a awlsam lo ang.

India hmeichhe boxer lar vawi ruk world champion ni tawh MC Mary Kom chu 51kg category-ah rank number pasarihna a ni a, India hmeichhe boxer dang Simranjit Kaur (60kg, rank - 4), Lovlina Borgohain (69kg, rank - 5) leh Pooja Rani Bohra (75kg, rank - 8) te chu top 10-ah an lang pha.

Olympic hmachhawn tur mipa boxer pali dang Manish Kaushik (63kg, rank - 18), Vikas Krishan Yadav (69kg, rank - 10), Ashish Kumar Chaudhary (75kg, rank - 9) leh Satish Kumar (+91kg, rank - 9) te zingah pathum chu top 10-ah an awm pha bawk.