Denmark-in Wales an nghaisa!

Euro 2020-a an match hmasa pahniha an tlawm hnuin Denmark chu match hnuhnung pahnihah an chak ta a, an thlen chin chu quarterfinal a ni.

Inrinni zan khan Euro last 16 match hmasa ber chu khelh a ni a, Denmark-in harsatna nei loin Wales chu 4-0 in an sawp - an match hnuhnung pahnihah goal riat an khung tihna a ni!

Denmark tan hian Kasper Dolberg chuan goal hnih a khung a, khel ṭha em em mai Joakim Maehle leh Martin Braithwaite ten goal khat ve ve an khung bawk.

Wales lamin a chhanletna tur an nei lo a, Italy, Switzerland leh Turkey awmna group aṭanga knockout round lut thei Wales-in a thiam pariat zinga tel an phu lo.

Bul ṭan ṭha Wales
Wales tan chuan tun Euro hi inelna hautak bik a ni - an group match hnih khel turin Baku-ah an zin a ngai a, match tawp bera Italy hmachhawn turin Rome khawpui an pan bawk.

Hetihlai hian Denmark erawh an group stage match thum chu Copenhagen-ah vek an khel a, last 16-a Wales nen an inhmachhawnna Amsterdam pawh Danish team tan chuan mahni mual ang mai a ni.

Wales fan-ten Covid-19 dan khirh tak avangin Netherlands an luh a rem lo a, Wales-in fans an ngah tawk lo. Johan Cruyff Arena-a fans 16,000 pungkhawm chu Denmark fans vek an ni maiin a lang a, Danish team jersey an ha deuh vek.

Hetiang boruak karah hian rin loh takin Wales-in inkhel bul an ṭan ṭha a, Gareth Bale a hmuhnawm a, chance vawi hnih a insiam nghal - penalty area-a Denmark captain Simon Kjaer-a handball ni awm tak referee-in a hmuh lohte chu Denmark vanneihna a ni.

A hming Dolberg
Wales khelh ṭhat lai takin Denmark tan Dolberg a rawn lang hlawl a, Ajax striker hlui hian a khelmual hman thiamah goal mawi bik a khung - tumah dem theih an awm lo a, a mawi em a, keeper Danny Ward tan tih theih a awm lo.

Denmark-in goal an khung hnuah Wales an talbuai zui a, an nawr let tura ngaih a nih laiin an insiamṭha thei tlat lo. Minute 40-naa hliam vanga right back Connor Roberts lakchhuah a ni chuan Wales a pui lo a, a aia luhtir Neco Williams a chesual.

Liverpool defender hian a ball petchhuah tur chu Dolberg-a ke bulah tak a pet a, kum 23 mi striker tan awlsam taka khung bak tih tur a awm tawh lo - he goal luh danah Wales-in an duh chuan sawisel tur an nei.

Dolberg-a goal khung hma hian Wales striker Kieffer Moore chu Kjaer-a'n a ti tlu a, foul nia a lan laiin referee-in a ham lo. Heta ṭanga ball kal zel chu Barcelona striker Braithwaite-a'n box chhungah a cross a, Williams-a'n pet sualin Dolberg-a'n hmingṭhatna a tel.

A chiang tawh
Dolberg-a goal hnihna a luh hian second half ṭan aṭanga minute thumna a ni a, Wales fans tam takin chawlhlawk hman zawha an team insiamṭha tura an beisei chu he goal hian a thaichhia.

Wales-in an insiamrem hmain an goal hnihna an chhuah a, an tan 'comeback' a harsa dawn tih a chiang tawh. Minute 88-naah vengtu nei lo Maehle-a'n Denmark goal thumna a khung a, hun pek belhah Braithwaite chuan goal lina a khung ve leh bawk.

Braithwaite-a goal hi offside niin a lang a, mahse, referee-in VAR a rawn hnuah pawh offside loa a ngaih avangin a pe tlang - a tawpah 4-0 in Denmark an chak a, quarterfinal luh an phu.

Barcelona striker-in an goal lina a khung hma lawk hian bench aṭanga luhtir Harry Wilson chu Maehle laka a foul avangin red card pek a ni a, Wales an mualpho takzet.

Wales tan beiseina
Denmark lakah Wales an tlawm a, mahse, he team tan hian beiseina a awm - Euro 2016 semifinal lut aṭang khan he team-ah hian player pariat ngawt an la awm a, ṭhangthar player, hmabak nei êngten an pawlh bawk.

Wales coach lailawk Robert Page chuan, "Ka player-te hian tunah rih chuan ngaihtuahna sen thiam an harsat mai thei a, mahse, he hun hi a liam ang a, kan hma hun a êng tih an thlir thiam ang.

"Player naupang tak tak an ni a, September-ah World Cup qualifier-in min hmuak nghal. Theihtawp kan chhuah lehnghal dawn - inelna hautak kan hmachhawn zo chiah a, hmachhawn zel pawh kan duh," a ti.

Wales midfielder Joe Allen chuan, "A vawi hnih nana group stage kan paltlang thei kha kan lawm takzet. Tunah chuan World Cup qualification ngaihtuah a ngai a, player naupang, hmabak nei êng tak tak kan nei a ni," tiin a sawi.