Bale-a'n zawhna a chhang duh lo

Wales captain Gareth Bale chu Denmark an hneh loh hnu lawkah ram tana a hma hun chungchang zawh ni mah se a chhang duh lo a, Real Madrid forward hian amah kawmtu journalist chu chhang loin a kalsan!

Euro 2020 khelh ṭan a nih hma khan Bale hian he inelna zawhah hian ram tana inkhelh a chawlhsan tur thu sawi rik a ni a, last 16-a Denmark-in 4-0 ngawta an sawp hnuah he zawhna hi zawh nawn a ni.

Mahse, inkhelh zawha interview-a hmachhawnah Bale-a'n he zawhna hi chhan ṭulin a hre lo a, he thu buatsaih a nih thleng hian kum 31 mi forward hian ram tana a hma hun chungchang sawifiahna a la nei lo.

Wales coach Robert Page chuan a player chet dan hi chhanin, "Player dang ang thoin hrehawm ti takin a awm a, engvangin nge a hma hun chungchang chu tun ang hunah a chhan duh ang? Ka ngaihdanah chuan kha zawhna kha zawhna ṭul lo tak a ni. Kan tlawm hlim hlawt a ni a, tuna zawhna tur chu team chungchang leh engtinnge kan insiamṭhat ang tih lam hi a ni," a ti.

Bale hian a hma hun chungchang sawi duh loa a kalsawn hma hian inkhel chungchang erawh a sawi a, season hmasaa Tottenham Hotspur-a loan-a hun hmangtu chuan, "Hrehawm kan ti takzet a, chu lo chu sawi tur ka nei tam lo.

"Quarterfinal luhna chance ṭha tak kan hloh a, mahse, kan inpekna erawh sawisel thei ka ni lo. Ka ṭhiante hi ka la chhuang em em reng a ni," a ti.

Wales player piang tawh zinga ropui ber ang hiala tam takin an ngaih Bale hian ram tan match 96 khelin goal 33 a khung a, assist vawi 20 a nei bawk - kum 31 chauh a la ni a, nakkumah World Cup khelh a nih dawn bawk avangin chawl rih lo tura duhtu an tam zawk ang.