Austria an khawng, a tawpah ITALY

Euro 2020 champion rinkai zinga mi Italy-in Austria hneh turin VAR ṭanpuina an mamawh a, extra time khelh a ṭul bawk. Inrinni zan Wembley Stadium-a inkhelah hun pangngaiah goal a lut lo a, extra time-ah Azzuri 2-1 in an chak.

Substitute pahnih Federico Chiesa leh Matteo Pessina ten extra time first half-ah goal an khung a, Austria-in Sasa Kalajdzic hmangin siphurh sut ṭhen mah se goal dang a luh belh lo.

Italy hian July 2, Zirtawpni zan dar 12:30-ah nizana Belgium leh Portugal inkhela chak zawk an hmachhawn dawn a, quarterfinal khelhna tur hi Allianz Arena, Munich a ni ang. Azzuri hian match 31 chhung hneh loh an tawng tawh lo a, Austria lakah beisei pha tawk lo mah se team ṭha an nihzia erawh an pholang tho.

A hmuhnawm nghal
Wembley Stadium-ah entu an tam tawk lo a, official-a chhinchhiah dan chuan mi 18,910 chauh an ni. Hetichung hian inkhel erawh ṭan phat aṭangin a hmuhnawm a, Ukraine laka chakna goal khungtu Christoph Baumgartner-a'n Italy tlarhnung tan hna a siam nghal a, Austria-in game nghet ṭha tak an lantir nghal.

Italy-in Austria tlarhnung ṭhiah an harsat a, Ciro Immobile leh Leonardo Spinazzola te chance neih pawh 'full chance' ni loin 'half chance' chauh a ni a, goal a lut lo chungin inkhel a hmuhnawm takzet.

Minute 17-naah vei lam aṭanga Spinazzola cross chu box chhung chiah aṭangin Nicolo Barella-a'n goal-ah pet mah se keeper Daniel Bachmann-a'n ṭha takin a dang. Darkar chanve a ral a, Immobile-a'n box pawn aṭangin goal-ah a 'risk' a, keeper Banchmann-a'n chet ngaihna hre lo mah se goal ban a per hnuah a out.

Italy chhantu VAR
First half-ah goal a lut lo a, second half-ah pawh Austria bawkin bul an ṭan ṭha zawk. Captain David Alaba-a'n box pawn chiaha an freekick hmuh chu goal zawnah a pet over. Lorenzo Insigne ten Azzuri tan chance nei bawk mah se Austria tan Marcel Sabitzer ten chance an rawn nei ve zel.

Minute 65-naah Stefan Lainer-a'n ding lam aṭangin ball a vawrh lut a, Alaba-a'n Di Lorenzo tauh khalhin Marko Arnautovic-a'n a tauh goal. Austria-in hmahruai phu khawpin an khel ṭha a, amaherawhchu VAR a inrawlh. Arnautovic hi a offside avangin goal-ah pawm a ni lo.

Mancini thutlukna
Italy coach Mancini-a'n insiamṭhat a ṭul tih hriain Marco Veratti leh Barella aiawh Manuel Locatelli leh Matteo Pessina te a dahlut nghal. Switzerland laka goal hnih khungtu hian inringtawk takin box pawn aṭangin goal-ah a pet nghal a, goal zawnah a pet lo.

Insigne-a'n a thiam dan takin mual sir lam aṭanga hlai luh a tum a, pressure sangah a pet fuh thei bik lo. Minute riat chiah a awm tawh tihin Spinazzola cross chu vengtu nei lo Domenico Berardi-a'n bicycle kick hmangin pet luh tum mah se a pet fuh tawk lo.

Mancini-a'n goal an mamawh tih hriain risk an la leh a, Immobile leh Berardi aiah Andrea Belotti leh Chiesa te a dahlut. Hun tawp dawn hnaiah Italy chungnung hret mah se goal hmuh tur a awm ta chuang lo.

Squad chhah
Italy-in player pali an thlak hian an tlukpui zel an dah lut thei a, Austria erawh squad a ṭhat tawk loh avangin minute 90 chhungin player pakhat chiah an thlak. Extra time-ah Chiesa-a'n pet goal a ngam tih lantirin keeper Bachmann tan hna a rawn siam nghal.

Minute 95-naah goal a lut ta nge nge. Spinazzola vawrhluh chu Chiesa-a'n la fuh tawk lo mah se amah chuhtu Konrad Laimer bum turin a rilru a fim a, Juventus forward hian chiang takin a pet goal. Insigne-a'n freekick ṭha zetin a pet a, keeper Bachmann-a'n dang mah se Italy an phur zel.

Minute 105-naah Insigne pass chu Francesco Acerbi-a'n box chhungah chelhin Pessina tan a siamsak a, Wales laka goal awmchhun khungtu hian tun ṭum inelna Euro 2020-a goal 100-na a khung. Azzuri-in goal hnih an khung tak avangin quarterfinal an hnaih sawt a, coaching staff zinga mi Gianluca Vialli lawm lutuk chuan an dinhmun a sawifiah.

Mahse maw, Austria an la tlawm duh lo. Second half ṭan chiahah substitute Louis Schaub-a'n box pawn aṭangin kawh zetin a pet a, keeper Donnarumma-a'n hming ṭhat nan a hmang. Sabitzer pawhin chance ṭha a nei a, goal zawnah a pet lo. Italy nuam sain an awm lo a, Mancini pawhin tlarhnung pui turin Insigne la chhuakin Bryan Cristante a luhtir. Subsitute Schaub-a'n chance ṭha a nei nawn a, box chhung aṭanga a volley chuan Spinazzola lu a per a, a over.

Austria-in goal an sual chhuak a, Schaub-a corner pet chu amah ang bawka bench aṭanga lut Sasa Kalajdzic-a'n huai taka tauhin minute 114-naah siphurh a sut ṭhen. Italy an hlauthawng a, amaherawhchu huaisen taka hun tawp thlenga nawrtu Austria-in goal dang an sual chhuak tawh lo.

Goal hnih kha khung hma ila, extra time khelh a ngai lo tur. Chutihrualin chak kan phuin ka hria. Bench aṭanga lut player-te rilru put hmang a dik a, inkhel an thlak danglam. Austria hi quarterfinal ai pawhin a harsa zawk thei a ni. Belgium leh Portugal te hi team ṭha ve ve an ni a, duh thlan tur pawh an awm lo. 
- Roberto Mancini, Italy coach

Wales laka ka goal khung kha theihnghilh harsa ka la ti a nia, tun ṭuma ka goal khung ka lawm dan tur chu inhrethiam mai ang. Kan team-ah chuan tu pawhin goal kan khung thei a, chu chu kan chakna a ni.
- Matteo Pessina, Italy midfielder

Kan thil tawn hi thua dah a harsa. Kan khelh danah inchhuanna tur a awmin ka hria a, Austria pawhin an chhuang ang. A tawp thlengin theihtawp kan chhuah a, kan thawhrimna lawmman erawh kan dawng ta lo. Pawm thiam a har hle a ni.
- David Alaba, Austria captain

Austria mipui zawng zawngin kan team hi an chhuan ka ring tlat. Goal ṭha tak ka khung a, khatiang em em khan ka luin lei a hnaih ka hre ngai lo.
- Sasa Kalajdzic, Austria forward

(Kalajdzic-a'n huaisen taka a tauh goal avangin match 11 chhung goal chhuah tawh lo Italy-in goal an chhuah phah a ni)

Chiesa fapa Chiesa
Italy tana goal pawimawh khungtu Federico Chiesa hi chuan football khawvelah a hming a la chher dawn chauh a, a pa Enrico Chiesa hre pha chuan an ngaina nghal ang. Enrico hi tunah chuan kum 50 mi a ni tawh a, kum 1988 khan Sampdoria-ah bul ṭanin hetah hian tun ṭuma Italy manager Roberto Mancini, team coordinator Gianluca Vialli leh assistant manager Attilio Lombardo leh technical coach Fausto Salsano te nen an khel ho.

Euro 1996-ah khan Enrico Chiesa hian Italy tan Czech Republic nen an inkhelh ṭumin goal a khung a, Italian striker Parma-ah a vanglai hun hmangin goalkeeper ropui Gianluigi Buffon te nen an khel ho. Kum 43 mi Buffon hi season liam ta khan Juventus tan la khelin Federico Chiesa te nen Coppa Italia nomawi an chawi a, he nomawi hi kum 1999 khan Enrico Chiesa te nen Parma tan an chawi tawh bawk.

Verratti a thlang
Italy leh Austria inkhelh hmain Manuel Locatelli nge Marco Verratti lut dawn tih chu inhnialna a ni a, Roberto Mancini-a'n player ṭha pakhat chu an awl a ngai dawn, a ti. Italian manager chuan thutlukna harsa chu a siam a, Switzerland laka goal hnih khungtu Locatelli aiah qualifier aṭanga a rin tawh zawk PSG midfielder Verratti a thlang.

Tlarhnungah Giorgio Chiellini leh Alessandro Florenzi te an la inpeih loh avangin an aiah Francesco Acerbi leh Giovanni Di Lorenzo te an lut bawk. Franco Foda erawhin Ukraine an hneh ṭuma bul ṭantute chungah rinna a nghat a, an match hnuhnung ber aṭangin player thlak danglam a nei lo.

Italy: Donnarumma; Di Lorenzo, Bonucci, Acerbi, Spinazzola; Barella (Pessina 67'), Jorginho, Verratti (Locatelli 67'); Berardi (Chiesa 84'), Immobile (Belotti 84'), Insigne (Cristante 108')

Austria: Bachmann; Lainer (Trimmel 114'), Dragović, Hinteregger, Alaba; Laimer (Ilsanker 114'), Grillitsch (Schaub 106'), X. Schlager (Gregoritsch 106'); Sabitzer, Baumgartner (Schöpf 90'); Arnautović (Kalajdzic 97')