La Liga-ah entu awm loin inkhel dawn

Spanish football-a league sang pahnih La Liga leh LaLiga 2 te chu kar hnih tal entu awm loa khelh a ni dawn a, he thutlukna hi coronavirus laka mipuite him zawk nana tih a ni. 

Nizan La Liga-a Eibar leh Real Sociedad inkhel aṭangin thutlukna hi hman ṭan nghal a ni a, La Liga chuan Spain sorkara ministry of health leh sports council thurawn anga an kal thu an sawi. Spanish second division (LaLiga 2) lam pawhin entu nei loin match an khelh a ngai dawn a, anni erawh kar laklawhah match a awm ve loh avangin Zirtawpni zana Racing leh Lugo inkhel aṭangin fans awm loa inkhelh hi an ṭan ve dawn a ni.