World no. 1-in European champion an hneh Belgium khingpui tur Italy

Pathianni zan khan Euro 2020 last 16-ah Belgium-in champion lai Portugal 1-0 a hnehin quarterfinal an lut. Goal awmchhun hi Thorgan Hazard khung a ni.

Roberto Martinez hote hian champion rinkai zinga mi Italy nen semifinal luh an inchuh dawn. Allianz Arena-ah July 2, Zirtawpni zan dar 12:30-ah inkhelh hmunawm bik hmuh tur a awm ang.

An fimkhur
La Cartuja Stadium, Seville-ah team ṭha pahnih an inhmachhawn a, Belgium tlarhmaah Romelu Lukaku, Kevin de Bruyne leh Eden Hazard te an awm. Portugal lamah Cristiano Ronaldo, Bernardo Silva leh Diogo Jota te an awm ve bawk.

Bench-a awm pawh Bruno Fernandes leh Joao Felix te an ni nawk a, golden generation tia chhal team pahnih an nih miau avangin khawvelin a ngaihven. Amaherawhchu team pahnih an inawr buan buan lo a, goal venhim an ngaih pawimawh ve ve avangin beisei angin a hmuhnawm lo.

Hazard-a nau
Eden Hazard thiamzia khawvelin a hria a, Real Madrid forward hi inhliam vangin a nih tur ang a ni phak tawk lo. Chelsea forward hlui hian nau inkhelh thiam a la nei a, a hming chu Thorgan Hazard a ni.

Borussia Dortmund winger Thorgan Hazard hian minute 42-naah yard 25 aṭangin kawh zetin a pet a, ball hi a kual avangin keeper Rui Patricio-a'n a dang thei lo. Hazard te unauin an goal khung an lawm a, Belgium player-te leh mipuiin an lawmpui bawk.

Red Devils hian goal attempt vawi ruk an neihah goal zawnah vawi khat chiah an pet a, hetihlai hian Portugal hian vawi 23 lai goal attempt an nei. Champion lai hian tlak duh loin hun tawp thlengin nawr mah se a pawimawh ber goal an hlawh chhuak thei lo.

No. 1 buaina inhliam
Belgium hi ni 1,000 chuang FIFA ranking-ah pakhatna ni tawh mah se nomawi an la hlawh chhuak lo a, golden generation hun liam hmaa champion an duh a nih chuan Euro 2020 hi hun ṭha a ni.

Portugal laka Red Devils tlarhnunga ding Thomas Vermaelen (35), Jan Vertonghen (34) leh Toby Alderweireld (32) ten an hun tawp lam an hmang a, inkhel bul ṭantu kum chawhrual kha kum 30 leh ni 148 a ni daih.

Chutihrualin tun ṭuma Belgium team ṭha tak kahruaitu zingah hian World Cup leh Euro nomawi chawi tawh Thierry Henry (coach) te an awm a, Arsenal striker hlui hian Romelu Lukaku pawh player ṭha zawkah a siam.

Amaherawhchu Portugal nena an inkhelh ṭum hian player ṭha bik pahnih Kevin de Bruyne leh Eden Hazard te chu inhliam vangin minute 48 leh 87-naah lakchhuah an ni a, Azzuri an hmachhawn thei ang em tih a chiang lo. KDB leh Hazard tel lo chuan Belgium team hi 'khuang lova chai ang" chauh an ni thei tlat.

Mangṭha Portugal
Champion lai Portugal erawhin group F-ah Hungary chauh an hneh avangin pathumna an ni a, team ṭha Belgium an hmachhawn phah. Cristiano Ronaldo leh a ṭhiante hian hun tawp thlengin goal khung tumin nawr mah se goal an sual chhuak lo.

Portugal coach Fernando Santos chuan, "Hrehawm kan ti takzet. Player ṭhenkhat room chhunga ṭap te an awm a, chak loh hi na an ti. Belgium khan goal-ah vawi ruk an pet a, goal khat an khung. Keini khan vawi 29 zet kan pet a, ṭum hnih ban kan tih per a, theihtawp chu kan chhuah. Final thlen kan inbeisei a, champion theih pawh kan inring. Mahse kan chak lo miau a, sawi tur a vang khawp mai," tiin a sawi.

Portuguese chanchinbu A Bola chuan, "Paris kan ta a ni reng" tiin thupui an hmang. Euro 2016-ah khan Portugal-in Stade de France-ah inelna thlengtu France hnehin an champion a, an nomawi hi chhuhsak theih an ni tawh lo.

Player inlante
Belgium: Courtois; Alderweireld, Vermaelen, Vertonghen; Meunier, Tielemans, Witsel, T. Hazard (Dendoncker 90'); De Bruyne (Mertens 48'), Lukaku, E. Hazard (Carrasco 87')
Portugal: Rui Patrício; Dalot, Rúben Dias, Pepe, Guerreiro; Joao Moutinho (João Félix 55'), João Palhinha (Danilo 78'), Renato Sanches (Sérgio Oliveira 78'); Bernardo Silva (Bruno Fernandes 55'), Ronaldo, Diogo Jota (André Silva 70')