Ronaldo Euro C'ship a tawp

German referee Felix Brych-a'n hun tawp hamrik an ham a, Portugal tan siphurh sutna hun a awm ta lo. Euro 2020 aṭangin champion lai Portugal an tla.

Cristiano Ronaldo chuan captain armband chu a phelh a, chhuatah a vawm nghal, nomawi humhim beiseina a tawp avangin a rilru a na tih hai rual a ni lo.

Juventus forward hian captain armband a chhar a, pawn lam panin Real Madrid tana a khelhpui ṭhin Thibaut Courtois nen an intawk. Ronaldo chuan, "In vannei tiraw? Vawiin chu ball kha goal-ah a lut thei tlat lo. Ṭha deuhin inkhel dawn nia," tiin a hrilh a, a kuah hnuah a kalsan.

Ronaldo-a'n khelmual a chhuahsan a, Kevin de Bruyne-a'n rawn kuah zawkin Real Madrid forward hlui hian dressing room lam a pan zel. Portugal captain hian a hmaa bottle awm chu a chhir a, captain armband chu paih thla lehin a chhir leh. A bula lo ding chuan captain armband chu a lo chhar a, Ronaldo nen an chhuak dun.

Engtin zel?
Kum 36 mi Ronaldo hian ngaihven a hlawh a, a chet velna zawng zawng deuh tho chu video hmanga hmuh tur a awm vek. Zawhna awm ta chu, Ronaldo tan Euro tawpna ber a ni em, tih hi a ni.

Portugal defender hlui Carlos Carvalhal chuan, "Goal leh record hi beisei lo se chuan a inkhelh tawh ka ring lo. Ka rin dan chuan season hnih chhung chu ṭha takin a khel ang a, World Cup pawh a khelh ngei ka ring," tiin a sawi.

Ronaldo hian World Cup a la khelh ngei a rinawm a, amaherawhchu Germany-in Euro 2024 a thlen hunah chuan Manchester United forward hlui hi kum 39 a ni tawh dawn a, a khelh a rinawm tawh lo zawk.

Belgium leh Portugal inkhel en chuan Euro-a Ronaldo inkhel hnuhnung ber an hmuah a ngaih theih a, chutihrualin mi bik Ronaldo hian football khelh a chawlhsan hun tur a la puang lo tih hriat a ṭha.

Mah se maw!
Euro 2020-ah Ronaldo hi inlan tawh dawn lo mah se goal nga a khung tawh miau avangin top scorer ni thei dinhmunah a la ding. Portugal captain hnaih bertu Czech Republic striker Patrick Schick-a'n goal li a khung a, goal thum khung zingah Belgium striker Romelu Lukaku leh Sweden midfielder Emil Forsberg ten match khelh tur an la nei thung.

Ronaldo hian inkhelh banah chak loh tuar thiam lo mah se inkhelh laia Kevin de Bruyne inhliam hnem hmasa ber chu amah tho hi a ni a, a record ropui tak avangin ngaihsan a hlawh zel ang.

Portugal captain hian ram tan goal 109 khungin Iran legend Ali Daei a nih rual a, Euro 2020-ah record khum hman lo mah se ama puala ram tana goal khung tam ber record nei turin hun rei nghah a ngai lo ang.