A hun a thleng ta : Zanin dar 9:30-ah England vs Germany
Euro 2020-a inkhel en châkawm ber zinga mi England leh Germany te chu zanin dar 9:30 hian Wembley Stadium-ah an inhmachhawn dawn. Ram inhal tak pahnih inkhel tur hian ngaihven a hlawh a, thawm an nei ring bawk.
England hi group D hmahruaitu an ni a, Netherlands hnehtu Czech Republic leh 2018 World Cup finalist Croatia te an hneh a, Scotland nen an inhnehtawk bawk.
Germany erawhin France hneh loin bul an ṭan a, Portugal an hneh hnuah an mualah Hungary lakah point khat hlawh chhuak hramin last 16 an lut.
Wembley Stadium chu
England-in 1966 World Cup an thleng a, Wembley Stadium-ah final khelh a ni. Nomawi inchuhnaah West Germany nen an inhmachhawn a, hun pangngaiah 2-2 in an inhnehtawk.
Extra time khelh a ni a, minute 101-naah Geoff Hurst ball petin crossbar a per a, hemi hnuah hian ball-in goalline a pel em tih chu inhnialna a ni ta. Swiss referee Gottfried Dienst chuan thutlukna siam thei loin linesman Tofiq Bahramov (Azerbaijan) a rawn a, England goal an pawmsak.
Hurst hian goal khat khung belh lehin England 4-2 in hnehna an chang a, FIFA World Cup chauh ni loin inelna liana an champion awmchhun a ni. Germany erawhin ball hian goalline a pel loah ngaiin an pawm thiam thei lo.
Euro 1996 khan Wembley Stadium-ah bawk hian England leh Germany an inhmachhawn a, final lut tur an zawng. Semifinal hmuhnawm bikah hun pangngaiah 1-1 in an inhnehtawk a, penalty hmangin chak zawk zawn a ni.
Player panga ve vein an pet zawhin 5-5 in an inhnehtawk a, tuna England manager Gareth Southgate rawn pen chhuakin tun ṭuma Germany goalkeeping coach Andreas Kopke-a'n a dansak. Andreas Moller-a'n chakna goal a rawn khung zui a, Germany hian Wembley Stadium-ah Czech Republic hnehin nomawi an chawi zui a, hemi hnu hian European Championship-ah an champion tawh lo.
Kum 1966 leh 1996-a England leh Germany inkhelhna Wembley Stadium hi chu a hlui zawk kha a ni a, an sak ṭhat hnuah tun ṭuma an inkhel tur hi a pawimawh ber ang. Wembley Stadium thara an inkhelh hnuhnun ber chu November 10, 2017 daih tawh kha a ni a, goal awm loin an inhnehtawk.
Engtin nge England an inlan dawn?
England-in group hmahruaitu ni chunga Euro last 16 an luh khan Germany, Portugal leh France zinga a tu 'emaw' ber an hmachhawn dawn tih a chiang sa. Three Lions hi group hmahruaitu ni kher lo se heng 'top team' ho hmachhawn loa kal thei an ni a, mahse, England coach Gareth Southgate chuan, "Champion tur chuan anni ang team hi hneh kan mamawh a ni," a ti a, a hlau lo.
Zaninah England-in quarterfinal luh tumin Germany an hmachhawn dawn ta nge nge a, 'pressure zo lo' tia tam takin an sawisel ṭhin Southgate hian eng ang takin nge player a rem ang, tih chu zawhna awm mek a ni.
Southgate-a squad enin Germany hneh tur khawp player chu a nei tih a chiang a, German ral lian tur dang zo khawpin player a rem thei ang em? tih erawh a chiang ta lo - England fan-ten hlauhna leh phurna inchenin he inkhel tur hi an thlir.
Sancho mawlh hi
Southgate-a'n group stage match thum an khelhah 4-3-3 formation hmang vekin a naute a rem a, 4-2-3-1 tia sawi theih a ni bawk - mahse, heng match thumah hian Jadon Sancho chu a chhawr lo vek! Manchester United-in an rim mek Sancho hian season hman zawh takah khan Borussia Dortmund tan match 38 khela goal 16 khungin assist 20 a nei a, khawvela footballer ṭhangduang ber pawl a ni.
Kum 21 mi forward hian Germany-ah season li ngawt hun a hman tawh bawk avangin German football hrechiangtu a ni a, Germany coach hlui Jurgen Klinsmann chuan, "A khel a nih chuan Germany-in an hlauh ber tur a ni ang," tiin a sawi hial. Sancho thiamna hai tur a awm lo - mahse, match thum ngawt bul ṭan loa dah tawh player hi match pawimawh, tlawm thian lohnaah hman thut chi a ni ang em, tih chu zawhna awm thei dang a ni a, Southgate-a'n 'risk' a lak ngam a rinawm loh.
Chutichuan...
Media leh fans zingah Sancho khel tura duhna a ri nasa a, Southgate-a'n a duhna aia mipui thawm ri a ngaithla a nih chuan Sancho hi chhawr thut thei a ni bawk - Sancho chhawr lo se, tlawm ta se...'ta se' tam takin a hual a, Southgate tan huaisen a pawimawh.
Covid-19 kaihhnawih avangin Mason Mount chu a inlan theih a la rinawm chiah lo a, chuti a nih chuan Jack Grealish chu Harry Kane-a hnung chiaha ding tura ngaih a ni. Southgate-a hnuaiah chuan Raheem Sterling hi khawih thiang lo ang hiala ngaih a ni a, mual ding lam sirah Phil Foden rawn kir tura ngaih a ni bawk - Foden hi Czech lakah squad-ah awm lo mah se yellow card a neih sa avanga fimkhurna mai a ni a, bul ṭan tawh tura ngaih a ni.
Czech lakah Bukayo Saka a hmuhnawm takzet a, mahse, Arsenal forward hi bench aṭanga game thlak danglam tura mamawh dan a zira a luh a rinawm zawk.
Tlarhnung lam
England match hmasa ber aṭangin tlarhnung lamah Southgate-a'n min barakhaih a, a player rem ṭhin dan enin Czech laka a tlarhnung kha zaninah a rin nawn a rinawm.
Manchester United captain Harry Maguire a dam chiang tawh a, John Stones nen inkawp tura ngaih an ni - Kyle Walker-a'n match hmasa berah beisei phak lo mah se right back-ah a 'nghet' leh tawh a, Luke Shaw chu mual vei lam sirah bul ṭan leh tura ngaih a ni.
Midfield-ah Jordan Henderson a dam tawh a, Champions League leh Premier League champion captain ni thei a nih avangin pressure sangah a buai lo ang - mahse, Kalvin Phillips leh Declan Rice te hi inkawp rem sa an nih avangin an inkawp a rinawm mah zawk.
Jordan Pickford hi keeper pangngai tak ni mah se sang taka dah a harsa a, mahse, England-in ani aia si ban nghak tur ṭha zawk an nei chuang lo - zaninah pawh goal a veng leh ang a, a chetsual loh a ṭul ang.
Penalty-a record nei ṭha Germany
England leh Germany inkhelh ṭumah hian penalty shootout awm thei a ni a, training-naah pawh an zir lawk ve ve. England hian competitive match-ah vawi kua penalty shootout an hmachhawn a, vawi thum chauh an chak. Germany erawh vawi sarih penalty shootout an hmachhawn hmasa bera Czechoslovakia an hneh loh tih loh chu a hnu lamah an chak vek.
England
3-4 v West Germany, 1990 World Cup semifinal
4-2 v Spain, Euro 96 quarterfinal
5-6 v Germany, Euro 96 semifinal
3-4 v Argentina, 1998 World Cup Last 16
5-6 v Portugal, Euro 2004 quarterfinal
1-3 v Portugal, 2006 World Cup quarterfinal
2-4 v Italy, Euro 2012 quarterfinal
4-3 v Colombia, 2018 World Cup Last 16
6-5 v Switzerland, 2019 Nations League 3rd
Place playoff
Germany
3-5 v Czechoslovakia, 1976 Euro final
5-4 v France, 1982 World Cup semifinal
4-1 v Mexico, 1986 World Cup quarterfinal
4-3 v England, 1990 World Cup semifinal
6-5 v England, Euro '96 semifinal
4-2 v Argentina, 2006 World Cup quarterfinal
6-5 v Italy, Euro 2016 quarterfinal
Inlan tura beiseite
England: Pickford; Walker, Stones, Maguire, Shaw; Rice, Phillips; Foden, Mount, Sterling; Kane
Germany: Neuer; Ginter, Hummels, Rüdiger; Kimmich, Goretzka, Kroos, Gosens; Havertz, Müller, Gnabry
Low-a'n a ngaihdan a sawh sawn dawn em?
Germany-in England an hma-chhawn hunah an khelh dan hmang thlak turin Joachim Low-a'n player a siksawi dawn em tih chu hriat châkawm a ni a, Hungary laka goal pawimawh khungtu Leon Goretzka chu inkhel turin a inpeih tih a lang.
Low-a duh dan
Germany boss Joachim Low-a'n group stage-ah starting eleven ngai a hmang char char a tih theih a, Hungary nen an inkhelh ṭumin inhliam vanga Thomas Muller aia Leroy Sane an luhtir tih loh chu player thlak a nei lo.
Goalkeeper-ah Manuel Neuer, defence lai pathumah Mats Hummels, Matthias Ginter leh Antonio Rudiger te awm. Mual sirah Robin Gosens leh Joshua Kimmich te an awm leh bawk. Midfield laiah Toni Kroos leh Ilkay Gundogan te an awm a, tlarhmaah Serge Gnabry, Thomas Muller leh Kai Havertz te an awm. Germany hian out and out striker an neih miau loh avangin Low-a player rem danah sawisel theih a tlem hle.
Goretzka a rawn lang
Season tawp lamah Bayern Munich midfielder Leon Goretzka a inhliam a, kum 26 mi midfielder hi Euro 2020 ṭantirhah a dam chiang hman lo. France an hneh loh ṭumin Goretzka a inlan lo a, Portugal an hneh ṭuma a inlan meuh chuan goal a luh hnem tawh avangin a khelh danin sawi zui a hlawh lo. Hungary nen erawh Goretzka chanchin sawi zui a ngai ta a, Bayern midfielder hian goal a khung miau avangin England nen hian Man City midfielder Gundogan aia thlan a nih pawhin a mak lo ang.
Goretzka hi 6ft 2in a sang a nih avangin corner leh freekick-ah a ṭangkai ṭhin a, nikum Covid-19 vanga lockdown a hman ṭhat avangin player ṭha bikah a chhuak. German midfielder hi sa pan lam a ni ṭhin a, lockdown vanga chawlh chhungin a taksa a ti chak a, player sa ṭha zingah a tel pha tawh.
Hansi Flick hnuaia Bayern Munich-in nomawi chawi theih zawng zawng an chawi ṭum khan Goretzka hi player pawimawh a ni.
Bayern an pawimawh
Germany squad-ah hian Bayern player pariat an awm a, Goretzka-a'n bul a ṭan a nih chuan player pangain bul an ṭan thei dawn tihna a ni. Player pathum defender Sule, Musiala leh Sane te chiah bench-ah an awm dawn tihna a ni a, anni pawh hi bench aṭanga lut thei vek an ni.
Bayern-a inhrechiang sa player-te hian Germany hi team ṭha zawkah an siam thei a, Joachim Low-a'n player dang nen a chawhpawlh thiam a ṭul ang. 2014 World Cup champion team-ah hian Chelsea player pathum Rudiger, Havertz leh Werner te an awm a, Thomas Tuchel hoa Champions League an champion ṭuma player pawimawh vek a ni.
Euro 2020-ah Rudiger leh Havertz te an pawimawh viau laiin Werner bik hian khelhna hmun a chang meuh lo a, amaherawhchu Wembley Stadium-a tawnhriat nei ṭha leh English player hrechiang Werner hian quarterfinal-ah hmun pawimawh a chang thei bawk.
Ngaihnawm
• Euro inelna bikah vawi li an inkhel tawh a, Germany hi vawi hnih chakin England hi vawi khat an chak a, vawi khat an inhnehtawk.
• Euro 2000 khan group khatah an awm ho a, England-in Alan Shearer goal hmangin Germany 1-0 in an hneh.
• Euro 72 khan quarterfinal-ah an inhmachhawn a, London-ah Germany hi 3-1 in an chak a, Berlin-ah 0-0 a inhnehtawkin aggregate-ah 3-1 in an chak.
• Euro 96-ah Germany-in England hi penalty shootout hmangin semifinal-ah an hneh.
• FIFA World Cup-ah ram pahnih hi vawi
nga an inhmachhawn a, Germany hi vawi hnih chakin England hi vawi khat an chak ve bawk.
• Ram pahnih hi vawi 32 an inhmachhawn tawh a, vawi 13 ve ve a chak. Chutihrualin England hian goal 51 an khung tawh a, Germany hian goal 42 chauh an khung thung.
• Germany player Antonio Rudiger, Timo Werner leh Kai Havertz (Chelsea), Bernd Leno (Arsenal), Robin Koch (Leeds United) leh Ilkay Gundogan (Manchester City) te hi Premier League-ah an khel mek. Emre Can (Liverpool 2014-18), Leroy Sané (Man City 2016–20) leh Jamal Musiala (Southampton 2010–11, Chelsea 2011–19) te England-ah an inkhel tawh bawk.
• England player Jadon Sancho leh Jude Bellingham (Borussia Dortmund) te hi Bundesliga-ah an khel mek.
