Beisei loh Czech-in Netherlands an barakhaih

Czech infiamna chanchinbu lar Sports chuan Netherlands nen an inhmachhawn hma khan, "Dutch team hneh dan kan hria," tih chu headline-ah hmangin an ziak a, an lo hre tak tak!

Pathianni zan khan Euro last 16 aṭangin Netherlands chu petchhuahin an awm a, rin hlawh lo zawk Czech Republic-in 2-0 in an hneh - Netherlands-in puanthuah an tel a, Czech erawh quarterfinal-ah Denmark-in an lo hmuak.

Netherlands defender pawimawh Matthijs de Ligt chu minute 55-naah hnawhchhuah a ni a, hei hi inkhel thlak danglamtu pawh a ni - Patrik Schick leh Tomas Holes ten player tam zawka an khelh hnuah goal an khung a, 2-0 in an chak.

A kuta ball a khawih luih vanga hnawhchhuah Ligt chuan, "A hrehawm ka ti takzet a, ka chet dan avangin kan tlawm a ni," a ti a, Czech laka an result chu a mawhphurhna a nih thu a sawi.

Bul ṭan ṭha
Netherlands-in 3-5-2 formation hmang bawkin bul an rawn ṭan a, he formation hmang hian group stage match thum aṭanga point kua an hlawhchhuah miau avangin an ṭhat dan ber tia sawi theih a ni.

Budapest khawpuiah Netherlands leh Czech fans pungkhawm an tam takzet a, inkhel en tinuam tham khawpin stadium khat an kalkhawm - Netherlands-in inkhel ṭantir lamah an nawr na zawk a, wing back pahnih Denzel Dumfries leh Patrick van Aanholt ten Czech tlarhnung an chhaih mangang leh ṭhin.

Barcelona player thar Memphis Depay leh Weghorst aia bul ṭantir Donyell Malen-te pawhin bul an ṭan pangngai viau a, mahse, player pahnih hian a hmawr an bawk thei ṭhin lo a, chu chu an buaina a ni.

Czech hi an bet reng bik lo - West Ham midfielder Tomas Soucek-a'n a huaisen rah sengin a tauh goal ṭep a, Antonín Barak 'class' deuh hlek se hnai set sawt aṭanga a chance ṭha neih kha goal-ah a chantir ngei ang.

Ṭanpuitu De Ligt
First half-ah team pahnihin tihsual an ngah a, game hmuhnawm tia sawi vul chuk tur a ni lem lo - chutihrualin team pahnih an inngam tawn a, extra time khel kher loa result chinfel tum ve ve an nih avangin a ṭul hunah an innawr ngam.

Second half ṭantirah Netherlands tan Donyell Malen chuan chance duhawm em em a rawn nei a, mahse, Liverpool nena sawizawm, PSV Eindhoven forward Malen chuan top club tana khel tur chuan a la nau hret tih pholangin goalkeeper Tomas Vaclik chiah a hmachhawn chungin a paltlang thei lo.

Malen-a chetsual a pawi zui - Czech lamin an vaw let zui zat a, Schick veng zo lotu De Ligt-a'n Bayer Leverkusen striker nen ball an inchuhna lamah tlu chungin ball a beng let a, a tirah tak chuan referee-in yellow card chiah a pe.

Mahse, VAR hmanga ennawn a nih hnuin De Ligt hian a duh thu ngeiin chiang takin a beng let tih a lang a, goal khung theihna chance a kut hmanga a dan avangin referee-in red card a pe zui.

Czech tan lawmna
Kum 21 mi lek ni chungin De Ligt-a'n ram tan a red card pahnihna a hmu der a, Dutch national team tana red card hmuh tam lamah Edgar Davids (3) chiah a phak lo tawh - insiamṭhat a mamawh tih a lang.

Czech-in player tam zawk an nih an chhawr ṭangkai vat a, Dumfries-a'n ṭha taka Pavel Kaderabek goal khung tur nia lang a dan hnuah Van Aanholt-a'n ṭul lo takin freekick-a chawi a, freekick aṭanga ball kal chu Tomas Kalas-a'n Holes tan a tauh a, Slavia Prague defender Holes hian hei hi goal-ah a tauh lut zui.

Goal khat chauh a ni a, player nei ṭha zawk Netherlands tan beisei a la awm cheu - mahse, Czech lamin ngaihdan dang an lo nei thung. Minute 80-naah Schick a lo lang ve leh a, Holes hnen aṭanga a ball hmuh duhthusam chu goal-ah a chantir. Netherlands tan thawhleh ngaihna a awm tawh lo.

Schick hian tun inelnaah goal li a khung ta a, a phak loh awmchhun Cristiano Ronaldo chuan goal nga a khung. Mahse, Portugal team an tlak tawh avangin Schick tan top scorer ni turin chance a ṭha ta hle.

Keimah vang a ni - De Ligt
Ball a hui let avanga red card pek Matthijs de Ligt chuan amah vanga tlawm an nih thu a sawi a, a inthiam thei lo. Juventus defender chuan, "Hrehawm ka ti a, tun hnua han en let hi chuan ball kha sawh tir miah lo tur ka ni. Ka thununna hnuaiah engkim a awm tawh a, mahse, ball kha ka sawt tir ta a ni.

"Min lo nam bawk si avangin ka tlu ta a, chuvang chuan ka kut kha ka hmang ta a ni," a ti a, hun pawimawha thutlukna siam sual chuan an team tan pawi a thlen thu a sawi. Mahse, De Ligt hi an coach Frank de Boer chuan a chhan a, Dutch coach chuan an chak loh chhanah amah lo chu puh tur dang an awm loh thu a sawi ve thung.

De Boer chuan, "A tawpah chuan mawhphurtu chu keimah ka ni a, darthlalangah ka nihna dik tak ka in ennawn leh a ṭul dawn a ni. "He team hian eng nomawi pawh beisei turin theihna kan nei a, mahse, tunah chuan hrehawm ti takin kan awm mek. He hun tawn hrehawm tak hi zaninah chuan ka mutpui phawt ang a, eng nge thleng zel chu kan hria ang chu," tiin a sawi.

Team ṭha tak kan hneh avangin ka team ka chhuang takzet a, ka player-te khan an hna tur an hrechiang em em vek a ni. Fans heti zozai hmaa hnehna kan chang thei hian minti lawm hle.
- Jaroslav Silhavy, Czech Republic coach

Hei aia ṭha zawk beisei theih a ni lo a, a ropui takzet a ni. Tumahin hei leh chen kan thlen hi an ring lo a, mahse, Netherlands hneh chunga heti taka khelh ṭhat hi chu a ropui a ni. Vawiina min ṭawiawmtu fans zawng zawng ten hun hlimawm tak an hmangin ka hria a, a nuam ka ti hle.
- Patrik Schick, Czech Republic forward

Goal kan khung tir te, chance kan chhawr loh te, khang zawng zawng kha ka ngaihtuahnaah hian a cham reng ringawt mai a ni. Red card hnuah kha chuan kan nawr hleithei tawh lo a, engkim kha kan tan a harsa tawh a ni.
- Georginio Wijnaldum, Netherlands captain